ހޮނު އެޅުމުގެ ކުރިން ރޯވެދާނެ ތަންތަން ދެނެގަނެވޭފަދަ އާ އާޓިފިޝަލް އިންޓެލިޖެންސް މޮޑެލެއް ތަރައްގީކޮށްފި އެވެ.

މި މޮޑެލްއިން ވައިލްޑްފަޔާ ލަފާކުރުމުގައި އިންގިލާބެއް ގެނެސްދޭނެ ކަމަށް ތަހުގީގުވެރިން ވަނީ ބުނެފަ އެވެ.

މި އޭއައި މޮޑެލް ތަރައްގީ ކޮށްފައިވާ ހޯދުންތެރިން ބުނާގޮތުގައި، މި މޮޑެލް ތައްޔާރުކުރެވިފައި ވަނީ ވިދުވަރުގެ ސަބަބުން ހޮނު އަޅައި، ހިނގާ އަލިފާނުގެ ހާދިސާތަކަށް އަމާޒުކުރެވިގެންނެވެ. އެގޮތުން މި މޮޑެލްއިން 90 އިންސައްތައަށް ވުރެ މަތީ ސައްހަކަމެއް ހާސިލްކުރެވިފައިވާ ކަމަށް ހޯދުންތެރިން ބުނެ އެވެ.

ބާ އިލާން ޔުނިވާސިޓީގެ ޑރ. އޯރެން ގްލިކްމަން އާއި ޑރ. އަސާފް ޝުމުއެލް މި މޮޑެލް ތައްޔާރުކުރުމުގައި އިސްކޮށް ވަނީ މަސައްކަތްކޮށްފަ އެވެ. މައުލޫމާތު ލިބިފައިވާ ގޮތުގައި، މި މޮޑެލް ތައްޔާރުކުރުމަށް 7 އަހަރުގެ ސެޓެލައިޓް ޑޭޓާ އާއި ތިމާވެށީގެ މައުލޫމާތު ވަނީ ބޭނުންކޮށްފަ އެވެ.

މި މޮޑެލްގެ ސަބަބުން ކުއްލި ހާލަތުގެ އިޖާބަދިނުމާއި ކާރިސާ މެނޭޖްކުރުމުގެ ދާއިރާއަށް ބޮޑު ބަދަލެއް އަންނާނެކަމަށް ހޯދުންތެރިން ލަފާކުރެ އެވެ.

މި މޮޑެލް އަދި ރިއަލް-ޓައިމް ފޯކާސްޓިން ނިޒާމުތަކާ ގުޅާލެވިފައެއް ނުވެ އެވެ. ނަމަވެސް މިއީ ވައިލްޑްފަޔާ ލަފާކުރުމުގައި ކުރިއަށް އެޅުނު މުހިންމު ފިޔަވަޅެކެވެ. މި މޮޑެލްގެ ސަބަބުން ފުރާނަ ސަލާމަތްކުރެވި، ތިމާވެށި ރައްކާތެރިކުރުމަށް އެހީތެރިވެދޭނެ ކަމަށް ތަހުގީގުވެރިން ގަބޫލުކުރެ އެވެ.