ރާއްޖެއަށް އިންޑިއާއިން އެތެރެކުރާ ޒަރޫރީ ބާވަތްތަކުން ރާއްޖެ އެތެރެކުރުމަށް ކަނޑައަޅާފައިވަ މިންވަރު އިންޑިއާއިން އިތުރުކޮށްދީފި އެވެ.

އެގައުމުގެ ކޮމާސް އެންޑް އިންޑަސްޓްރީ މިނިސްޓްރީން އިއްޔެ ހާމަކޮށްފައިވާ ގޮތުގައި ރާއްޖެއަށް އެތެރެކުރާ ޒަރޫރީ ބާވަތްތަކުގެ ތެރެއިން، ކާބޯތަކެތީގެ ބާވަތްތަކާއި، ކޮންސްޓްރަކްޝަން މަސައްކަތް ކުރުމަށް ބޭނުން ކުރާ ތަކެތީގެ މިންވަރު ވަނީ އިތުރުކޮށްފަ އެވެ.

އެގޮތުން ހިލައާއި، ހިލަވެލި ރާއްޖެއަށް އެތެރެކުރުމަށް އެގައުމުން ކަނޑައެޅި މިންވަރުގެ 30 އިންސައްތައަށާއި 1،300،000 މެޓްރިކް ޓަނަށް ވަނީ އިތުރުކޮށްދީފަ އެވެ. އޭގެ އިތުރުންވެސް ކެއުމަށް ބޭނުންކުރެވޭ ޒަރޫރީ ބާވަތްތަކުގެ ތެރެއިން ބިސް، އަލުވި، ފިޔާ، ހަކުރު، ހަނޑޫ، ފުށް ރާއްޖެއަށް އެކްސްޕޯޓް ކުރާ މިންވަރު، ފަސް އިންސައްތައަށް ވަނީ އިތުރުކޮށްފަ އެވެ.

އެގޮތުން އިތުރުވި މިންވަރަކީ:

އިންޑިއާއިން ވަނީ ގިނަ ޤައުމުތަކަށް އަސާސީ ކާބޯތަކެތި އެކްސްޕޯޓްކުރުން ހުއްޓާލާފައެވެ. ނަމަވެސް، އެ ޤައުމުގެ 'ނޭބަރހުޑް ފަސްޓް' ސިޔާސަތުގެ ދަށުން، ދިވެހިރާއްޖެއަށް މި ބާވަތްތައް އެކްސްޕޯޓްކުރުން ދަނީ ކުރިއަށެވެ. މީގެ ތެރޭގައި ހިމެނެނީ:

• ބިސް: 448,913,750

• އަލުވި: 22,589 މެޓްރިކް ޓަން

• ފިޔާ: 37,537 މެޓްރިކް ޓަން

• ހަނޑޫ: 130,429 މެޓްރިކް ޓަން

• ފުށް: 114,621 މެޓްރިކް ޓަން

• ހަކުރު: 67,719 މެޓްރިކް ޓަން

• މުގު: 350 މެޓްރިކް ޓަން

ރާއްޖެއަށް މިތަކެތި މީގެ ކުރިން އެތެރެކުރި އަދަދު ތަކަކީ 1981 ވަނަ އަހަރުން ފެށިގެން އެގައުމުން ރާއްޖެއަށް ޒަރޫރީ ކާބޯތަކެތީގެ ބާވަތްތަކާއި އަދި ހިލަވެލި އެތެރެކުރަން އެއްބަސްވެވި އިންޑިއާއިން ކަނޑައެޅި އެންމެ ބޮޑު އަދަދުތަކެވެ. އެއާއެކު މި ފިޔަވަޅަކީ ދެ ޤައުމުގެ ދެމެދުގައިވާ ރަޙްމަތްތެރިކަމާއި އެކުވެރިކަން ދަމަހައްޓައި، ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށް އެޅުނު މުހިންމު ފިޔަވަޅެކެވެ.