ދަތުރުކުރި ޖައްވީ އުޅަނދަށް ޖެހުނު މައްސަލައެއްގެ ސަބަބުން ޖައްވުގައި ނުވަ މަސް ދުވަސް ހޭދަކުރަން ޖެހުނު ސައިންސްވެރިން ކަމަށްވާ ސުނީތާ ވިލިއަމްސްއާއި ބަޗް ވިލްމޯ އަނބުރާ ދުނިޔެއަށް އައުމަށްފަހު ފުރަތަމަ ފަހަރަށް އިންޓަވިއުއެއް ދީފި އެވެ.

އެ ދެ ސައިންސްވެރިން ދުނިޔެއަށް ގެނައުމަށް އެޅި ސްޕޭސް އެކްސްގެ ކްރޫއާ ވެސް އެކު ބޭއްވި ނޫސްވެރިންގެ ބައްދަލުވުމުގައި ވިލިއަމްސްއާއި ބަޗްމޯ ވަނީ އެމީހުންގެ ތަޖުރިބާ ހިއްސާ ކޮށްފަ އެވެ.

ވިލިއަމްސް ވަނީ އެ ދެ ސައިންސްވެރިން ތިބީ "ޖައްވުގައި ތާށިވެފައި" ކަމަށް ބުނާ ބުނުމާ ދެކޮޅު ހަދައި އެމީހުންގެ ދަތުރަށް ލިބުނު ސަމާލުކަމާމެދު ހައިރާންވާ ކަމަށް ބުނެފަ އެވެ.

"އެ މަންޒަރުތަކާއެކު ފޫހިވާނީ ކިހިނެއް؟ ތާށިވެފައި ތިބި ކަމުގެ އެއްވެސް އިހުސާސެއް އަހަރުމެންނަކަށް ނުކުރެވޭ" ވިލިއަމްސް ބުންޏެވެ.

ސްޕޭސް އެކްސްގެ ސްޕޭސް ކްރާފްޓެއްގައި ވިލިއަމްސްއާއި ވިލްމޯ މިދިޔަ މަހު ދުނިޔެއަށް އައިސްފައިވާއިރު އެމީހުންގެ ރިހެބިލިޓޭޝަން ޕްރޮގްރާމް ވަނީ ވަގުތުން ފެށިފަ އެވެ.

އެގޮތުން އެ ޕްރޮގްރާމް ފެށިތާ ހަފްތާއެއްގެ ތެރޭގައި ދެ މޭލަށް ދުވެފައިވާ ކަމަށާއި އެހެން ކަމުން ސިއްހަތު އާދައިގެ ހާލަތަށް އަންނަމުންދާ ކަމަށް ވެސް ވިލިއަމް ބުންޏެވެ.

ނުވަ މަސް ދުވަހު ޖައްވުގައި ހޭދަކުރުމުން ވިލިއަމްސްއާއި ވިލްމޯގެ ސިއްހަތަށް ނޭދެވޭ އަސަރުތަކެއް ކޮށްފައިވާނެ ކަަމަށް މީޑިއާގައި ވާހަކަ ދެކެވުނެވެ.

އެ އިންޓަވިއުގައި ސައިންސްވެރިން ވަނީ ޖައްވީ މިޝަންގެ ކަންކަން ސިޔާސީ ކުރަން އެމެރިކާގެ ރައީސް ޑޮނަލްޑް ޓްރަމްޕްއާއި އޭނާގެ އެންމެ ގާތުން މަސައްކަތްކުރާ މަހުޖަނު އިލަން މަސްކް މަސައްކަތްކުރި ނަމަވެސް އެއީ ސިޔާސީ ކަމެއްގެ ގޮތުގައި ނުދެކޭ ކަމަށް ބުނެފަ އެވެ.

ސްޓާ ލައިނާގެ ޓެސްޓް ފްލައިޓެއްގައި މިދިޔަ އަހަރުގެ ޖޫން މަހު ވިލިއަމްސްއާއި ވިލްމޯ ބައިނަލްއަގްވާމީ ޖައްވީ ސްޓޭޝަނަށް ދިޔައީ ހަފްތާއެއްގެ ތެރޭގައި އެނބުރި އައުމަށެވެ. އެހެން ނަމަވެސް އެ އުޅަނދުގައި މައްސަލަޖެހި އެ ދަތުރު ނުވަ މަސް ދުވަހަށް ދިގުލައިގެން ދިޔައީ އެވެ.

ވިލްމޯ ވަނީ އަލުން ފުރުސަތު ލިބިއްޖެނަމަ ސްޓާ ލައިނާ އުޅަނދުގައި ހުރި މައްސަލަތައް ހައްލުކޮށްގެން އަލުން އޭގައި ދަތުރު ކުރާނެ ކަމަށް ވެސް ބުނެފަ އެވެ.