މި ހަފްތާ ތެރޭގައި މީޑިއާގައި އެންމެ ބޮޑަށް ދައުރުވި އެއް ހަބަރަކީ އެމޭޒަންގެ ވެރިޔާ އަދި މަޝްހޫރު މަހުޖަނު ޖެފް ބެޒޯސްއާއި އޭނާގެ ބައިވެރިޔާ ލޯރެން ސަންޗޭޒް ކައިވެނި ކުރަން އުޅޭ ހަބަރެވެ.

ޖެފްއާއި ލޯރެން އެމީހުންގެ ކައިވެނީގެ ތައްޔާރީތައް ފަށާފައިވާއިރު މިއީ މިފަހުން މުޅި ދުނިޔޭގައި ވެސް ބޭއްވޭނެ އެންމެ ކުލަގަދަ ކައިވެނީގެ ހަފްލާ ކަމަށް ގިނަ ބަޔަކު ގަބޫލު ކުރެ އެވެ.

މިކަން ފާހަގަކޮށް ލޯރެންގެ ބޭބެ ޕައުލް ސަންޗޭޒް ވެސް ވަނީ އެ ދެމީހުންގެ ކައިވެންޏަކީ މިހިނގާ 21 ވަނަ ގަރުނުގެ "ގަރުނުގެ ކައިވެނި"ގެ ގޮތުގައި ސިފަކޮށްފަ އެވެ.

ކައިވެންޏަށް ތައްޔާރު ވުމުގެ ގޮތުން ޖެފްއާއި ލޯރެން ވަނީ ދާދި ފަހުން މިލާންގެ ޑޮލްސޭ އެންޑް ގަބާނާ އައުޓްލެޓަށް ގޮސް ބާޒާރު ކޮށްފަ އެވެ. މިއީ ދުނިޔޭގެ އެންމެ އަގުބޮޑު އެއް ފެޝަން ބްރޭންޑެވެ.

ޖެފްއާއި ލޯރެންގެ ކައިވެނި އަންނަ ޖޫން މަހު އިޓަލީގެ ވެނިސްގައި ބާއްވަން ހަމަޖެހިފައިވާއިރު އެ ކައިވެނިން ދުނިޔޭގެ އެކި ކަންކޮޅުތަކުން މަޝްހޫރު ޝަހްސިއްޔަތުން ފެންނާނެ ކަމަށް ބެލެވެ އެވެ.

އެގޮތުން މަޝްހޫރު ފިލްމީ ތަރިންނާއި ވިޔަފާރިވެރިންގެ އިތުރުން ވެސް ސިޔާސީ ދާއިރާގެ ބައެއް ފަރާތްތައް އެ ކައިވެނީގެ ތެރެއިން ފެނުން އެކަށީގެންވެ އެވެ.

އެ ކައިވެންޏަކީ މިފަހުން ބޭއްވުނު އާނަންތު އަމްބާނީއާއި ރަދިކާ މާޗަންތުގެ ކައިވެންޏަށްވުރެ ވެސް ކުލަގަދަ ކައިވެންޏަކަށް ވާނެ ކަމަށް ގިނަ ބަޔަކު ގަބޫލުކުރެ އެވެ.

21 ވަނަ ގަރުނުގެ "ގަރުނުގެ ކައިވެނި"ގެ ގޮތުގައި ޖެފްއާއި ލޯރެންގެ ކައިވެނި ސިފަ ކުރެވެމުން ދާއިރު 20 ވަނަ ގަރުނުގެ "ގަރުނުގެ ކައިވެނި"ގެ ގޮތުގައި ބެެލެވިފައި އޮންނަނީ 1981 ވަނަ އަހަރު އޮތް ޕްރިންސް ޗާލްސްއާއި ޕްރިންސަސް ޑައާނާގެ ކައިވެންޏެވެ.