ރާއްޖޭގައި ހިންގާ ސްކޭމްގެ މައްސަލަތަކުގައި ފޭރޭ ފައިސާ، އެކައުންޓުތަކުން ބޭރުކުރުމުގެ ކުރިން ހުއްޓުވުމުގެ ބާރު ފުލުހުންނާއި މާލީ އިދާރާތަކަށް ލިބިދޭގޮތަށް ޖިނާޢީ އިޖުރާއަތުގެ ގާނޫނަށް ގެނައި އިސްލާހާއެކު މިހާރު ވަގުތުން އެކައުންޓް ފްރީޒް ކުރެވޭނެ ކަމަށް ފުލުހުން ބުނެފި އެވެ.

މިއާއެކު ސްކޭމް މެދުވެރިކޮށް ގެއްލޭ ފައިސާ އަނބުރާ ހޯދުމަށް ވީއެންމެ އަވަހަކަށް ރިޕޯޓްކުރުމަށް ފުލުހުން އެދެ އެވެ.

ފުލުހުން ބުނީ ރާއްޖޭގައި ސްކޭމްގެ މައްސަލަތައް އިތުރުވާން ފަށާފައި ވަނީ ކޮވިޑްގެ ދުވަސްވަރު އާންމު މާލީ މުއާމަލާތްތައް ކުރުމަށް ގެނެވުނު ބަދަލާއެކު ކަމަށެވެ. އަދި ސްކޭމްގެ މައްސަލަތައް އިތުރުވުމާ ގުޅިގެން އެކަން ހުއްޓުވުމަށް ގިނަ މަސައްކަތްތަކެއް ކުރެވުނު ނަމަވެސް، ނިޒާމީގޮތެއްގައި އެންމެ ހަރުދަނާކަމާއެކު އެ މަސައްކަތް ކުރެވެން ފެށީ، މަރުކަޒީ ނިޒާމެއްގެ ތެރެއިން އެ މަސައްކަތް މިދިޔަ 2024 ވަނަ އަހަރުގެ މެދުތެރޭގައި އެންޓި ސްކޭމް ސެންޓަރު އުފެއްދުމުން ކަމަށް ފުލުހުން ބުނެ އެވެ.

ސްކޭމްގެ މައްސަލަތައް ހުއްޓުވުމުގައި ގާނޫނީގޮތުން ހުރި ކަމަށް ބުނެ ފުލުހުން ޝަކުވާކުރަން ފެށުމުން ޖިނާއީ އިޖުރާއަތުގެ ގާނޫނަށް ދާދިފަހުން ވަނީ އިސްލާހެއް ގެނެސްފަ އެވެ. މިދިޔަ އަހަރުގެ ޑިސެމްބަރު މަހުގެ 17 ވަނަ ދުވަހު ރައީސުލްޖުމްހޫރިއްޔާ ތަސްދީގުކުރި އެ އިޞްލާހަށް އަމަލުކުރަން ފަށާފައި ވަނީ އިއްޔެއިން ފެށިގެންނެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އިންސްޕެކްޓާ އޮފް ޕޮލިސް ހެޑް އޮފް އެންޓި ސްކޭމް ސެންޓަރު އާދަމް ނަވީދް ވިދާޅުވީ މި އިސްލާހާއެކު އަންނަ އެންމެ ބޮޑު ބަދަލަކީ، ސްކޭމް މެދުވެރިކޮށް ފޭރިގަންނަ ފައިސާ މާލީ ނިޒާމުގެ ތެރެއިން ބޭރުކުރުމުގެ ކުރިން ހުއްޓުވުމުގެ ބާރު ފުލުހުންނަށާއި މާލީ އިދާރާތަކަށް ލިބުން ކަމަށެވެ. އެގޮތުން ސްކޭމްގެ މައްސަލައެއް ފުލުހުންނަށް ހުށައެޅުމަށް އަންނަ ކޯލާއި ހިސާބުން އެމަޢުލޫމާތު މާލީ އިދާރާތަކާއި ވަގުތުން ހިއްސާކުރެވޭނެ ކަމަށް އޭނާ ވިދާޅުވި އެވެ.

"ފޯން ކޯލު ނިމޭއިރު، ސްކޭމްގެ ޒަރިއްޔާއިން މީހެއްގެ އެކައުންޓުން ފޭރިގެންފައިވާ ފައިސާ ހުއްޓުވުމަށްޓަކައި އެ އެކައުންޓް ފްރީޒްކުރުމުގެ ބާރު ފުލުހުންނަށް މިހާރު ވަނީ ލިބިދީފައި. މީގެ ކުރިން ސްކޭމްގެ މާލީ މުއާމަލާތް ހުއްޓުވުމަށް ކޮންމެ އެކައުންޓެއް ފްރީޒްކުރުމަށް ވަކިވަކިން ކޯޓު ޢަމުރު ހޯދަންޖެހުނަސް އަލަށް އަމަލުކުރަން ފެށި އިސްލާހާއެކު އެންމެ ކޯޓު އަމުރަކުން އެތައް އެކައުންޓެއް ފްރީޒްކުރެވޭނެ،" ނަވީދް ވިދާޅުވި އެވެ.

އޭނާ ވިދާޅުވީ މިއީވެސް މިފަދަ މައްސަލަތައް ހުއްޓުވުމަށް ލިބުނު ފަސޭހައެއް ކަމަށެވެ.

"އެހެންވީމަ އަޅުގަނޑުމެންނާ ހަމަަށް ސްކޭމެއް ރިޕޯޓްކުރެވި ކޯލް ނިމޭއިރު ހަގީގަތުގަ މާލީ އިދާރާތަކަށް ފުލުހުންގެ ފަރާތަކުން އެދާންޖެހޭ މައުލޫމާތުތަކެއް ގޮސް، އެ އިދާރާއަކުން އެ ފިޔަވަޅު އަޅާފަ އޮންނާނީ. އެހެންވީމަ މި އިޞްލާހާ ގުޅިގެން އަޅުގަނޑުމެންނަށް ސިސްޓަމް ތެރެއިން ފައިސާ ބޭރުވުމުގެ ކުރިން ހުއްޓުވޭއެބަ. އެއީ ވަރަށް ބޮޑު ތަސައްލީއެއް ރާއްޖޭގެ ސްކޭމްގެ ހާލަތަށް ބަލާއިރު ހުއްޓުވުމަށް،" ނަވީދު ވިދާޅުވި އެވެ.

ނަވީދު ވިދާޅުވީ މިއިސްލާހާއެކު މިފަދަ މުއާމަލާތެއް މާލީ ނިޒާމުގެ ތެރެއިން ހިނގާކަމުގެ ޝައްކުކުރެވޭ ހިސާބުން، އެ މައުލޫމާތު ފުލުހުންނަށް ހުށައަޅަންޖެހޭ ކަމަށެވެ. އަދި ފުލުހުން އެދޭ ހާލަތްތަކުގައި ލިޔެކިޔުމަކާއި ނުލާ، ޝައްކުކުރެވޭ ފަރާތްތަކުގެ ބައެއް މަޢުލޫމާތާއި މާލީ މުޢާމަލާތުގެ މަޢުލޫމާތު ހިއްސާކުރަންޖެހޭ ކަމަށް ވެސް އޭނާ ވިދާޅުވި އެވެ.

"މިއިސްލާޙާއެކު 48 ގަޑިއިރަށް ފައިސާ އަވަސްގޮތެއްގައި ހިއްފެހެއްޓުމަށްފަހު، ކޯޓު އަމުރުގެ ދަށުން މިމުއްދަތު އިތުރުކުރުމުގެ ފުރުސަތު ވެސް ކަމާބެހޭ އިދާރާތަކަށް ލިބިދޭ. މިއިސްލާޙާއެކު ކުށްކޮށްގެން ހޯދާ ފައިސާ މާލީ ނިޒާމުގެ ތެރޭގައި ހިފެހެއްޓުމުގެ ބާރު ފުލުހުންނަށް ލިބިދޭއިރު މިކުށްތައް ހުއްޓުވުމުގައި އާއްމުންގެ އެއްބާރުލުން މުހިންމެވެ. ސަބަބަކީ ސްކޭމެއް ހިންގައިފިނަމަ އެކަން ވީއެންމެ އަވަހަކަށް ފުލުހުންގެ ސްކޭމް ސެންޓަރަށް އެންގުން،" ނަވީދު ވިދާޅުވި އެވެ.

މިކަމަށްޓަކައި ނޭޝަނަލް އިމަޖެންސީ ނަމްބަރު 911 މެދުވެރިކޮށް އަދި ސްކޭމްގެ ކުށް ރިޕޯޓުކުރުމަށް އެކުލަވާލާފައިވާ ޚާއްސަ ހޮޓްލައިން 125 މެދުވެރިކޮށް ވެސް ރިޕޯޓުކުރެވޭނެ ކަމަށް ފުލުހުން ބުނެ އެވެ.