ރާއްޖެއަށް ކްރޫޒްލައިނާތައް މަދުމަދުން އަންނަން ފަށައިފި އެވެ.

މިފަހަރު ރާއްޖެ އައިސްފައިވަނީ ސްރީލަންކާއަށް ނިސްބަތްވާ ކްރޫޒްލައިނާއެކެވެ.

"އެމްއެސް ޒުއިޑަޑަމް" ކިޔާ މި ކްރޫޒްލައިނާއިން ރާއްޖެއަށް 1،274 ޓޫރިސްޓުންނާއި 751 ކްރޫ މެންބަރުން އައިސްފައިވެ އެވެ.

ސްރީލަންކާގެ ކްރޫޒްލައިނެއް ރާއްޖެ އައިއިރު، މިއީ މިމަހުގެ ތެރޭގައި ރާއްޖެ އައި ދެވަނަ ކްރޫޒްލައިނާ އެވެ.

މިމަހު ކުރީކޮޅު ސޭޝެލްސްއިން ވެސް ވަނީ ކްރޫޒްލައިނެއް އައިސްފަ އެވެ. އެ ކްރޫޒްލައިނުން 576 ޓޫރިސްޓުން ޒިޔާރަތްކުރި އެވެ.

ކްރޫޒް ލައިނާތަކުގައި ރާއްޖެ އަންނަ ޓޫރިސްޓުންގެ އަތުން ވެސް މިހާރު ޓީޖީއެސްޓީ ނަގާތީ ކްރޫޒް ލައިނާގައި ރާއްޖެ އައުމުގެ އަގު ބޮޑުވެ، ކްރޫޒްތައް ރާއްޖެ އައުން ހުއްޓާލުމުން، ޓޫރިޒަމް މިނިސްޓްރީން އެ ގަވައިދު މިދިޔަ އަހަރު ފަހުކޮޅު ބަދަލުކޮށްފައިވެ އެވެ.

އެ ގަވައިދު ބަދަލުކުރުމުން ރާއްޖެއަށް ފުރަތަމަ އައީ އިޓަލީއަށް ނިސްބަތްވާ ކްރޫޒް ޝިޕެއް ކަމަށްވާ އޭއައިޑީއޭ އެވެ.