ހިންގުމުގެ ޚަރަދު ބޮޑުވެ، އެސްޓީއޯގެ ފައިދާ މިދިޔަ އަހަރު ބޮޑުތަނުން ދަށަށް

ހިންގުމުގެ ޚަރަދު އިންތިހާއަށް ބޮޑުވެ، އެސްޓީއޯގެ ސާފު ފައިދާ މިދިޔަ އަހަރު ބޮޑުތަނުން ދަށަށް ހިނގައްޖެ އެވެ.

ރާއްޖޭގައި އެންމެ ފުޅާ ދާއިރާއެއްގައި ތެލާއި ގޭހުގެ ވިޔަފާރިކުރާ ކުންފުނިން އިއްޔެ އާއްމުކުރި މާލީ ހިސާބުތައް ދައްކާ ގޮތުން މިދިޔަ އަހަރުގެ ސާފު ފައިދާއަކީ 717.1 މިލިއަން ރުފިޔާ އެވެ. އޭގެ ކުރީ އަހަރު ސާފު ފައިދާގެ ގޮތުގައި 818.2 މިލިއަން ރުފިޔާ ލިބިފައިވެ އެވެ.

މިދިޔަ އަހަރު އެ ކުންފުނީގެ ފައިދާ ދަށްވިއިރު ހިންގުމުގެ ހަރަދުގެ ގޮތުގައި ވަނީ އެއް ބިލިއަން ރުފިޔާ ހޭދަކޮށްފަ އެވެ. އޭގެ ކުރީ އަހަރު ހިންގުމުގެ ހަރަދުގެ ގޮތުގައި ހޭދަކޮށްފައި ވަނީ 924.2 މިލިއަން ރުފިޔާ އެވެ.

ފައިދާ ދަށްވިއިރު އާމްދަނީ ވެސް ދަށަށް

މިދިޔަ އަހަރު އެ ކުންފުންޏަށް އާމްދަނީގެ ގޮތުގައި ލިބިފައި ވަނީ 15.3 ބިލިއަން ރުފިޔާ އެވެ. އޭގެ ކުރީ އަހަރު އާމްދަނީގެ ގޮތުގައި 16.3 ބިލިއަން ރުފިޔާ ލިބިފައިވެ އެވެ.

އެ ކުންފުނީގެ މިދިޔަ އަހަރު އާމްދަނީ ދަށްވިއިރު ވިޔަފާރި ކުރުމަށް ކުރި ހަރަދު ވެސް ވަނީ ދަށްވެފަ އެވެ. އެގޮތުން މިދިޔަ އަހަރު ވިޔަފާރިކުރުމަށް ހޭދަކޮށްފައި ވަނީ 13 ބިލިއަން ރުފިޔާ އެވެ.

އެސްޓީއޯއިން ބުނީ އެ ކުންފުނީގެ އާމްދަނީ ދަށްވުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގަށް އައިބަދަލާއެކު ކުންފުނިން ވިއްކަމުން ދިޔަ ތެލުގެ އަގު ދަށްކުރުމުން ތެލުގެ ވިޔަފާރިން ލިބުނު އާމްދަނީ ދަށްވުމެވެ.

އެސްޓީއޯގެ މެނޭޖިން ޑިރެކްޓަރު ކަމާ ޝިމާދު އިބްރާހިމް ހަވާލުވި ފަހުން އެ ކުންފުނީގެ ވިޔަފާރި ވަނީ ވަރަށް ދަށްވެ، ސަރުކާރުން އަންގާ ސިޔާސީ ކަންކަމަށް ހޭދަކުރާ ތަނަކަށް ބަދަލުވެފަ އެވެ. އަދި އެ ކުންފުނި ތެރޭގައި ކޮރަޕްޝަނާއި ނާޖާއިޒު ފައިދާ ނެގުން އިންތިހާއަށް އިތުރުވެފައިވާ ކަމަށް އެ ކުންފުނީގެ އިސް މުވައްޒަފުން ނަން ނުޖެހުމަށް އެދި ކިޔައިދީފައިވެ އެވެ.

ޝިމާދު ހަވާލުވި ފަހުން މިދިޔަ އެއް އަހަރު ތެރޭގައި އެސްޓީއޯގެ ވިޔަފާރި ފުޅާކުރުމަށް އެއްވެސް ކަމެއް ކޮށްފައެއް ނެތެވެ. ސަރުކާރުން އަންގައިގެން އެމްޕީއެލްއާ ގުޅިގެން އެތައް މިލިއަން ޑޮލަރެއް ހޭދައެއްކޮށްގެން ރާއްޖޭގެ އުތުރުގައި ފެށި ބަންކަރިންގެ ހިދުމަތް ވެސް ވަނީ ފެއިލްވެފަ އެވެ. އަދި ސަރުކާރުގެ ހަރަދުތައް ހަމަޖައްސަން އެސްޓީއޯގެ ނަމުގައި ބޮޑެތި ލޯނުތައް ނަގައި އެ ކުންފުނި ވަނީ ވަރަށް ބޮޑަށް ދަރުވާލައިފަ އެވެ.

މިގޮތުން މިދިޔަ އަހަރު ނިމުނުއިރު ލޯނާއި އެހެނިހެން ދަރަނީގެ ގޮތުގައި 885.4 މިލިއަން ރުފިޔާ ނަގާފައިވެ އެވެ. އަދި އެ ކުންފުންޏަށް ލިބެންޖެހޭ ފައިސާގެ އަދަދު ހަތަރު ބިލިއަން ރުފިޔާއަށް އަރަ އެވެ. މީގެ ތެރެއިން ބޮޑު ބަޔަކީ ފެނަކަ ކޯޕަރޭޝަނުން ދައްކަން ޖެހޭ ފައިސާ އެވެ.