ކުރީގެ ރައީސް މައުމޫން އަބްދުލްގައްޔޫމް އިސްކޮށް ހުންނަވައިގެން އުފެއްދި މޯލްޑިވްސް ރިފޯމް މޫވްމަންޓް (އެމްއާރުއެމް) އުވާލައިފިއެވެ.

އެމްއާރްއެމް އުވާލިކަން އިލެކްޝަންސް ކޮމިޝަނުން ވަނީ އިއުލާންކޮށްފަ އެވެ. އެ ކޮމިޝަނުން ކުރި އިއުލާނުގައި ވަނީ ސިޔާސީ ޕާޓީތަކުގެ ގާނޫނުގައި ސިޔާސީ ޕާޓީއެއް ދެމިއޮތުމަށް ބޭނުންވާ 3000 މެންބަރުންގެ އަދަދު އެމްއާރުއެމަށް ހަމަވެފައިނުވާތީ އެ ޕާޓީ އުވާލީ ކަމަށެވެ.

އެ އަދަދު ހަމަކުރުމަށް އިލެކްޝަންސް ކޮމިޝަނުން އެމްއާރްއެމްއަށް ފުރުސަތު ދިނެވެ. ނަމަވެސް އެ މުއްދަތުގެ ތެރޭގައި ޕާޓީއަށް މެމްބަރުން ހަމައެއް ނުކުރެވުނެވެ.

އިލެކްޝަންސް ކޮމިޝަނުގެ ތަފާސްހިސާބުތަކުން ދައްކާގޮތުގައި މިދިޔަ އަހަރު ނިމުނުއިރު އެމްއާރުއެމްގެ ދަފްތަރުގައި ތިބީ 1،867 މެންބަރުންނެވެ.

މީގެކުރިން ވެސް އެ ކޮމިޝަނުން ވަނީ އެމްއާރްއެމް އުވާލަން ނިންމާފަ އެވެ. ނަމަވެސް އޭރު އެ ޕާޓީން ސިވިލް ކޯޓަށް މައްސަލަ ހުށަހެޅުމުން އެ ކޯޓުން ވަނީ ޕާޓީ އުވާލީ ގާނޫނާ ހިލާފަށް ކަމަށް ކަނޑައަޅާފަ އެވެ.

ހުކުމަށްފަހު ވެސް މެމްބަރުންގެ އަދަދު 3000އަށް ހަމަކުރަން ދިން ފުރުސަތުގައި އެ ޕާޓީއަށް އެކަން ކުރެވިފައެއްނުވެ އެވެ.

އެމްއާރުއެމް އުވާލާފައިވާއިރު ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމް އުވާލުމުގެ މަސައްކަތްވެސް ދަނީ ކުރަމުންނެވެ. އެ ޕާޓީ އުވާލުމަށް ނިންމާފައިވާއިރު މިދިޔަ އަހަރު ނިމުނުއިރު އެ ޕާޓީއަކީ ރާއްޖޭގައި 10،000 މެންބަރުން ހަމަވާ 4 ސިޔާސީ ޕާޓީގެ ތެރެއިން އެއް ޕާޓީއެވެ. އެ ޕާޓީގެ ދަފްތަރުގައި 12،174 މެންބަރުން އެބަތިއްބެވެ.