އިންޓަނެޓް ބޭންކިން މެދުވެރިކޮށް ބޭރު ފައިސާ މާރުކުރެވޭ ޕްލެޓްފޯމެއް ބޭންކް އޮފް މޯލްޑިވްސް (ބީއެމްއެލް) އިން ތައާރަފްކޮށްފި އެވެ.

މި ޕްލެޓްފޯމު މެދުވެރިކޮށް ޑޮލަރު މާރުކުރާނީ 15.42 ރުފިޔާގެ ރޭޓުންކަން ފާހަގަކޮށް ބީއެމްއެލް އިން ބުނީ ކުރާ ހުރިހާ ޓްރާންސެކްޝަންތަކެއް ފަސޭހަކަމާއެކު ބަލާލެވެން ހުންނާނެ ކަމަށެވެ.

ބީއެމްއެލް އިން ބުނީ ރިސޯޓު، ހޮޓެލް، ގެސްޓްހައުސް އަދި ފަތުރުވެރިކަމުގެ ދާއިރާއާ ގުޅުންހުރި އެހެނިހެން ވިޔަފާރިތަކުން ބޭރުފައިސާ މާރުކުރުމަށް އިންޓަނެޓް ބޭންކިން މެދުވެރިކޮށް ކުރެވިގެންދާނެ ކަމަށާއި، މި ހިދުމަތް ދެވިގެންދާނީ ބޭރު ފައިސާގެ ގަވައިދާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ކަރަންސީ ރެގިއުލޭޝަނާ އެއްގޮތަށް ކަމަށެވެ.

މި ހިދުމަތާއެކު ފަތުރުވެރިކަމުގެ ދާއިރާގެ ވިޔަފާރިތަކަށް ލާޒިމްކޮށްފައިވާ ބޭރު ފައިސާ މާރުކުރުމަށް މަގުފަހިވެގެން ދާނެ ކަމަށާއި، ކަސްޓަމަރުންނަށް އިތުރު ލުއި ފަސޭހަތަކެއް ލިބިގެންދާނެ ކަމަށް ބީއެމްއެލް އިން ބުންޏެވެ.