ޕީއެސްއެމްގެ މެނޭޖިން ޑިރެކްޓަރު މުހައްމަދު ސައީދު މަގާމުން އިސްތިއުފާ ދެއްވައިފި އެވެ.

"ހުރިހާ"އަށް އެނގިފައިވާގޮތުގައި ސައީދު އިސްތިއުފާ ދެއްވީ މިއަދު އެވެ. މި ސަރުކާރުން އެންމެ ފުރަތަމަ އެ ކުންފުނީގެ މެނޭޖިން ޑިރެކްޓަރު ކަމަށް އައްޔަން ކުރި ޒީނާ ޒާހިރު ވެސް އިސްތިއުފާ ދެއްވި އެވެ. ސައީދު މެނޭޖިން ޑިރެކްޓަރު ކަމަށް އައްޔަން ކުރެއްވީ އޭގެފަހުންނެވެ.

ސައީދު އިސްތިއުފާދެއްވި ސަބަބެއް އަދި ނޭނގެ އެވެ.

އޭނާ އިސްތިއުފާ ދެއްވާފައި މިވަނީ ޓީވީއެމް އިން ގެނެސްދިން ބައެއް ކޮންޓެންޓްތަކާ ގުޅިގެން ގިނަ ބައެއްގެ ފާޑުކިޔުން އަމާޒުވެފައި ވަނިކޮށެވެ.

ލައިވް އިވެންޓެއް ގެނެސްދެމުން ދަނިކޮށް ކޮންޓްރޯލް ރޫމް ބަދަލުކުރި ދަނޑިވަޅުގައި ގުރުއާނުގެ ކަލިމައެއް އުނިވެފައިވާ ކަމަށް ބުނެ ޕީއެސްއެމް އިން ވަނީ އެކަމަށް މައާފަށް އެދިފަ އެވެ. އަދި ބޭއަދަބީ މަންޒަރުތަކެއް ބްރޯޑްކާސްޓް ކުރެވުނު މައްސަލާގައި ވެސް އެ ކުންފުނިން ވަނީ މައާފަށް އެދިފަ އެވެ.