ޖަޕާނު ސަރުކާރުން މޯލްޑިވްސް ކޯސްޓް ގާޑުގެ އިންސާނީ އެހީތެރިކަމުގެ މަސައްކަތްތައް ހަރުދަނާކުރުމަށްޓަކައި 7.6 މިލިއަން އެމެރިކާ ޑޮލަރުގެ އަގުހުރި ސާމާނު ހަދިޔާކޮށްފި އެވެ.

ހޯމަ ދުވަހު މިކަމަށް ބޭއްވުނު ޚާއްސަ ރަސްމިއްޔާތެއްގައި މި އިކުއިޕްމަންޓްތައް ދިވެހިރާއްޖޭގައި ހުންނަ ޖަޕާނުގެ ސަފީރު ތަކެއުޗި މިދޯރީ ވަނީ ދިވެހިރާއްޖޭގެ ދިފާއީ ވަޒީރު މުޙައްމަދު ޣައްސާން މައުމޫނަށް ޙަވާލުކޮށްދެއްވާފަ އެވެ.

ޖަޕާނުގެ މި އެހީގެ ދަށުން ހަދިޔާކުރެވުނު ތަކެތީގެ ތެރޭގައި ހިމެނެނީ ކަނޑުމަތީގެ މުވާސަލާތީ ނިޒާމްތައް، ޕްރޮފެޝަނަލް ޑައިވިންގ ގިއަރ، ސާރޗް އެންޑް ރެސްކިއު އިކުއިޕްމަންޓް އަދި އެހެނިހެން އެހީތެރިވާ ސާމާނާއި، ސާމާނު ރައްކާކުރާ ވަސީލަތްތަކެވެ. މީގެ ތެރޭގައި އިންމާސެޓް ޔުނިޓްތަކާއި، ޖީއެމްޑީއެސްއެސް ކޮންސޯލްތަކާއި، މެރިން އިންފްރާރެޑް ކެމެރާތަކާއި، ޓެޓްރާ މުވާސަލާތީ ވަސީލަތްތަކާއި، ސްޓޭޝަންްޓޭޝަންތައް ހިމެނެއެވެ.

ޖަޕާނުގެ މި އެހީ ދެވިފައިވަނީ 2020 ވަނަ އަހަރުގެ ނޮވެމްބަރު 22 ވަނަ ދުވަހު ޖަޕާނު ސަރުކާރާއި ދިވެހި ސަރުކާރާ ދެމެދު ސޮއިކުރެވުނު އެކްސްޗޭންޖް އޮފް ނޯޓްސްގެ ދަށުންނެވެ.

މި އެއްބަސްވުމަކީ އިގުތިސާދީ އަދި އިޖްތިމާޢީ ތަރައްގީގެ ޕްރޮގްރާމްތަކުގެ ދަށުން 800 މިލިއަން ޖަޕާނީ ޔެން ނުވަތަ 7.6 މިލިއަން އެމެރިކާ ޑޮލަރު ގެ އެހީއެއް ދިނުމަށް ވެވުނު އެއްބަސްވުމެކެވެ.

ޖަޕާނު ސަރުކާރުން ހަދިޔާ ކުރި މި އިކުއިޕްމަންޓްތަކުގެ ސަބަބުން ރާއްޖޭގެ މުވާސަލާތީ ނިޒާމް ފުޅާވެ، ކޯސްޓް ގާޑަށް އެމީހުންގެ އޮޕަރޭޝަންތައް އިތުރަށް ހަރުދަނާކަމާއި ފުރިހަމަކަމާއެކު ވިލަރެސްކުރެވޭނެކަމަށް އެ ފަރާތުން އުންމީދުކުރެ އެވެ.

އަދި މިކަމުގެ ސަބަބުން ދިވެހިރާއްޖެއާއި ޖަޕާނާ ދެމެދު އޮންނަ ދެފަރާތުގެ ގުޅުން އިތުރަށް ބަދަހިވެގެންދާނެ ކަމަށްވެސް ޖަޕާނު ސަރުކާރުން ބަޔާންކޮށްފައިވެ އެވެ.