އަލިފާނުގެ ހާދިސާއާ ގުޅިގެން 29 މީހަކު ވަގުތީ ހިޔާތަކަށް

ތިން މިނިސްޓްރީއެއް ހިންގަމުން އައި މ. ގްރީން ބިލްޑިންގައި މިއަދު ހިނގި ނުރައްކާތެރި އަލިފާނުގެ ހާދިސާ އާ ގުޅިގެން އެ ސަރަހައްދުގައި ހުރި 3 އިމާރާތަކުން 29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް ކުރަމުން އަންނަ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

ހައުސިން މިނިސްޓްރީ ހިމެނޭގޮތަށް ގިނަ މިނިސްޓްރީތަކެއް ހިންގަމުން އަންނަ ގްރީން ބިލްޑިންގައި އަލިފާން ރޯވެފައި ވަނީ މިއަދު ހެނދުނު 6:30 ހާއިރު އެވެ.

އެ ބިލްޑިންގައި ރޯވުމާ ގުޅިގެން އެމްއެންޑީއެފްގެ ފަޔަ އެންޑް ރެސްކިޔު ސާވިސަސް އާއި ވީއައިއޭގެ ފަޔާފައިޓަރުން ވަނީ އަލިފާން ނިއްވުމަށް އެ ސަރަހައްދުގައި ހަރަކާތްތެރިވެފަ އެވެ.

ގްރީން ބިލްޑިންގައި ރޯވިއިރު، އެ އިމާރާތާ ޖެހިގެން ހުންނަ އޮފީސް އިމާރާތްތަކުންނާއި އެ ސަރަހައްދުގައި ހުރި ބައެއް އޮފީސް އިމާރާތްތަކުން މުވައްޒަފުން ވަނީ ނެރެފަ އެވެ. އަދި ކަމާ ގުޅުންހުރި އިދާރާތަކުން ވަނީ އެ ސަރަހައްދުގައި ހުރި ގެތަކުން މީހުން ނެރެ، ހުސްކޮށްފަ އެވެ.

ތިން މިނިސްޓްރީއެއް ހިންގަމުން އައި އޮފީސް އިމާރާތުގައި ހިނގި އަލިފާނުގެ ހާދިސާ އާ ގުޅިގެން އެންޑީއެމްއޭ އާއި މޯލްޑިވިއަން ރެޑް ކްރެސެންޓް (އެމްއާރުސީ) ގެ ޓީމުތަކުން އެ ސަރަހައްދުގައި ވަނީ ހަރަކާތްތެރިވެފަ އެވެ.

އެންޑީއެމްއޭއިން ބުނެފައިވާ ގޮތުގައި އަލިފާނުގެ ހާދިސާ އާ ގުޅިގެން އެ އޮތޯރިޓީގެ އެހީތެރިކަމަށް އެދި 50 މީހުން ގުޅި އެވެ. އަދި އެ ފަރާތްތަކުގެ ރަޖިސްޓްރޭޝަން ހެދިފައިވާ ކަމަށާއި ބޭނުންވާނެ ޒަރޫރީ އެހީތެރިކަން ފޯރުކޮށްދިނުމަށް ސޯޝަލް ސެންޓަރުގައި ހެދިފައިވާ އިވެކުއޭޝަން ސެންޓަރު ވަނީ ތައްޔާރު ކުރެވިފައި ކަމަށް ވެސް ބުނެ އެވެ. އެހެންނަމަވެސް އާއިލާތަކުގެ އެދުމުގެ މަތިން ވަގުތީ ގޮތުން އެ ފަރާތްތައް ތިމާގެ ގޭގެއަށް ވަނީ ބަދަލުކުރެވިފައި ކަމަށް ވެސް އެންޑީއެމްއޭއިން ބުންޏެވެ.

އެ އޮތޯރިޓީން ބުނީ 3 އިމާރާތެއްގެ 7 ގޭބީސީއަކުން 29 މީހަކު ވަގުތީ ހިޔާތަކަށް ބަދަލުކުރުމުގެ މަސައްކަތް މިވަގުތު ކުރަމުންދާ ކަމަށެވެ. އެއީ މ. ލޯކަށިގެ، މ. ކުދިމާވިލާ އަދި މ. ލޫބިޔާއިން ކަމަށެވެ.

ވަގުތީ ހިޔާތަކަށް ބަދަލުކުރެވިފައި ވަނީ 15 ފިރެހެނުންނާއި 14 އަންހެނުންނެވެ. މީގެ ތެރޭގައި ސިއްހީ ހާއްސަ އެހީތެރިކަން ބޭނުންވާ ފަރާތެއް ވެސް ހިމެނޭކަމަށް އެ ފަރާތުން ބުނެ އެވެ.