2034 ވަނަ އަހަރުގެ ފީފާ ވޯލްޑް ކަޕް ސައުދީ އަރަބިއްޔާގައި ބޭއްވުމަށް ފީފާ އިން ނިންމައިފި އެވެ.

2034 ވަނަ އހަރުގެ ވޯލްޑް ކަޕް ފުޓުބޯޅަ މުބާރާތް ސައުދީގައި ބޭއްވުމަށް ފީފާއިން ނިންމިއިރު، 2030 ވަނަ އަހަރުގެ ވޯލްޑް ކަޕް ސްޕެއިނާއި، ޕޯޗުގަލް، އަދި މޮރޮކޯ ގުޅިގެން ބާއްވަން ފީފާ އިން ވަނީ ނިންމައިފަ އެވެ.

2030 ވަނަ އަހަރުގެ ވޯލްޑް ކަޕްގެ ބައެއް މެޗުތައް އުރުގުއޭ އާއި އާޖެންޓީނާ އަދި ޕެރެގުއޭގައި ވެސް އެ ކުޅެން ވަނީ ހަމަޖައްސާފަ އެވެ. އެއީ އެ އަހަރަކީ ފީފާ އިން ވޯލްޑް ކަޕް ބާއްވާތާ ގަރުނެއް ފުރޭ އަހަރު ކަމަށް ވުމުންނެވެ.

މި ނިންމުންތައް ނިންމާފައިވަނީ ފީފާ އިން މިއަދު ވީޑިއޯ ކޮންފަރެންސްކޮށް ބޭއްވި އެކްސްޓްރާ އޯޑިނަރީ ކޮންގްރެސްގަ އެވެ.

މީގެ 10 އަހަރު ފަހުން 2034 ގައި އޮންނަ ވޯލްޑް ކަޕް ބާއްވަން ފީފާ އިން ފުރުސަތު ދީފައި އޮތީ އޭޝިއާ އާއި އޯޝެނިއާގެ ގައުމުތަކަށެވެ. އެ ފުރުސަތު ހޯދުމަށް ކުރިމަތިލީ އޮސްޓްރޭލިއާ އިން ބިޑު އަނބުރާ ގެންދިއުމުން ސައުދީ އަށް ކުރިން ވެސް އޮތީ ނުރަސްމީކޮށް ބިޑު ކާމިޔާބުވެފަ އެވެ.

މިއާ އެކު ސައުދީ ވެގެންދާނީ ވޯލްޑް ކަޕް ބާއްވާ އަރަބި ތިން ވަނަ ގައުމަށެވެ. ފުރަތަމަ ގައުމަކީ 2022 ވަނަ އަހަރުގެ ވޯލްޑް ކަޕް ބޭއްވި ގަތަރެވެ. އަދި ސައުދީ ވެގެންދާނީ ވޯލްޑް ކަޕް ބާއްވާ އިސްލާމީ ދުނިޔޭގެ ތިން ވަނަ ގައުމަށެވެ. ގަތަރުން ފުރަތަމަ ހޯދި އެ ޝަރަފް ދެ ވަނަ އަށް ހޯދާނީ 2030 ގެ މުބާރާތުގެ އެއް ހޯސްޓް މޮރޮކޯ އެވެ.

2034 ވަނަ އަހަރުގެ ވޯލްޑް ކަޕް ސައުދީގައި ބާއްވަން ފީފާއިން ހަމަޖެއްސިއިރު، ސައުދީގެ ބިޑު ފޮތުގައިވާ ގޮތުން މުބާރާތް ބާއްވާނީ އެ ގައުމުގެ ފަސް ސިޓީއެއްގަ އެވެ. އެއީ ވެރިރަށް ރިޔާދް، ޖިއްދާ، އަލް ޚޮބަރް، އަބްހާ، އަދި ނައޫމް އެވެ. މުބާރާތް ކުރިއަށް ގެންދާނީ 15 ސްޓޭޑިއަމެއްގައި ކަމަށް ވެސް އޭގައި ވެ އެވެ. އޭގެ ތެރެއިން 11 ސްޓޭޑިއަމަކީ މުޅިން އަލަށް ބިނާކުރާ ތަންތަނެވެ. ބެލެވޭ ގޮތުގައި ހުޅުވާ މެޗާއި، ފައިނަލް މެޗު އޮންނާނީ ރިޔާދުގައި ހުންނަ ކިންގް ސަލްމާން ސްޓޭޑިއަމުގަ އެވެ.

ސައުދީ އަކީ ފުޓްބޯޅަ ލީގަކީ މިވަގުތު ދުނިޔޭގެ ގިނަ ބައަކު ބަލާ މަޝްހޫރު ލީގެކެވެ. އެގޮތުން ކްރިސްޓިއާނޯ ރޮނާލްޑޯ ހިމެނޭހެން، ކަރިމް ބެންޒެމާ، ފިރުމީނޯ އަދި ސަދިއޯ މާނޭ ފަދަ ދުނިޔޭގެ މަޝްހޫރު ތަރިން އަންނަނީ ސައުދީ ލީގުގައި ކުޅެމުންނެވެ.