އުސޫލުތަކާ ހިލާފަށް މިފްކޯއަށް އޯވަޑްރާފްޓް (އޯޑީ) ފެސިލިޓީއެއް ދޫކޮށްފައި ނުވާނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފި އެވެ.

ބީއެމްއެލް އިން 700 މިލިއަން ރުފިޔާގެ އޯވަޑްރާފްޓެއް އާންމު އުސޫލުތަކާ ހިލާފަށް ދޫކޮށްފައިވާ ކަމަށް ބުނެ "އަދަދު" ނޫހުން ޝާއިއުކުރި ލިޔުމެއް ދޮގުކޮށް ބީއެމްއެލް އިން ވަނީ ބޭންކުގެ އިތުބާރު ގެއްލޭފަދަ ގޮތަށް ހަބަރު ޝާއިއުކޮށްފައިވާތީ އެކަން ކުށްވެރިކޮށްފަ އެވެ.

ބީއެމްއެލް އިން ބުނި ގޮތުގައި އެ ބޭންކުން ކަސްޓަމަރުންނަށް ހިދުމަތް ދެމުން އަންނަނީ ބޭންކިން ގާނޫނާއި އެ ގާނޫނުގެ ދަށުން ހެދިފައިވާ ގަވާއިދުތަކާއި އިންޓަނޭޝަނަލް ބެސްޓް ޕްރެކްޓިސްތަކާ އެއްގޮތްވާ ގޮތުގެ މަތިންނެވެ.

"މި ގޮތުން ބަލްކް ޓްރާންސްފާގެ ހިދުމަތް ސަރުކާރުގެ އިދާރާތަކާއި ކުންފުނިތަކާއި އަމިއްލަ ކުންފުނިތަކާއި ވިޔަފާރިތަކަށް ދެމުން އަންނަނީ އާންމު އުސޫލުތަކާ އެއްގޮތަށެެވެ،" ބީއެމްއެލް އިން ނެރުނު ބަޔާނުގައި ބުނެފައިވެ އެވެ.

ބީއެމްއެލް އިން ބުނީ އެ ބޭންކުގެ އެންމެ މަތީ މަސްލަހަތަކީ ޑިޕޮސިޓަރުންގެ ރައްކާތެރިކަން ކަމަށެވެ.

ބީއެމްއެލް އިން ވަނީ އެ ބޭންކުން އަބަދުވެސް އަމަލު ކުރަމުންދާނީ ބޭންކުން އަމަލު ކުރަމުންދާ ހަރުދަނާ އުސޫލުތަކާ އެއްގޮތަށްކަމުގެ ޔަގީންކަން އަރުވާފަ އެވެ.

މަސްވެރިންނަށް 48 ގަޑިއިރުގެ ތެރޭގައި ފައިސާ ދިނުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދު ނުފުއްދި ދިގުލައިގެން ދާތީ މަސްވެރިންގެ ކަންބޮޑުވުންތައް އޮތީ ބޮޑުވެފަ އެވެ. މަސްވެރިންނަށް މިފްކޯއިން ދައްކަން ޖެހޭ ފައިސާ ދައްކަނީ ބީއެމްއެލްގެ އޯޑީ ފެސިލީޓީގެ ތެރެއިންނެވެ. މި ފެސިލިޓީއަށް މިފްކޯއަށް ފައިސާ ދައްކަން ޖެހެނީ ޑޮލަރުންނެވެ.