އަންނަ ރޯދަ މަހާ ދިމާކޮށް ތަކެތީގެ އަގުތައް އުފުލިދާނެތީ އެކަމަށް ވިސްނައިގެން ރޯދައަށް ތައްޔާރުވުމުގެ މަސައްކަތް ފަށައިފި އެވެ.

އެގޮތުން މިއަދު ވަނީ ރޯދައަށް ތައްޔާރުވުމުގެ ގޮތުން އިކޮނޮމިކް މިނިސްޓްރީއާއި ސަރުކާރުގެ ވިޔަފާރީގެ މައި ކުންފުނި އެސްޓީއޯގެ ވެރިން ބައްދަލުކުރައްވައި މަޝްވަރާތައް ކުރިއަށްގެންގޮސްފަ އެވެ.

މިކަމާ ގުޅިގެން އިކޮނޮމިކް މިނިސްޓްރީން ބުނީ އެސްޓީއޯގެ ވެރިންނާ އެކު މިއަދު މަޝްވަރާ ތައް ކުރަން ފަށާފައިވާކަމަށާއި އެގޮތުން ރޯދައަށް ތަކެތީގެ އަގު ހިފެހެއްޓުމަށާއި، މެދުނުކެނޑި ރައްޔިތުންނަށް ބޭނުންވާ އަސާސީ މުދާ ފޯރުކޮށްދެވޭނެ އިންތިޒާމުތައް ހަމަޖެއްސުމަށް މަޝްވަރާތައް ކުރެވުނު ކަމަށެވެ.

އިކޮނޮމިކް މިނިސްޓްރީން ބުނީ ރައީސް ޑރ. މުހައްމަދު މުއިއްޒު ބޭނުންވާ ގޮތަށް އެ އިންތިޒާމުތައް ހަމަޖައްސާނެ ކަމަށެވެ.

ރޯދަ މަހާ ދިމާކޮށް އާންމުކޮށް ފިޔާ، ބިސް، އަލުވި އަދި މިރުސް ފަދަ ތަކެތީގެ އަގުތައް އުފުލޭތީ އެސްޓީއޯ އިން އެފަދަ ތަކެތި ގަނޑުކޮށް ރާއްޖޭގެ ބާޒާރަށް ނެރެ އަގު ކޮންޓްރޯލް ކޮށްދެ އެވެ.

އެސްޓީއޯ އަކީ ރޯދަ މަހާ ދިމާކޮށް ދުރާލައި ބައެއް އަސާސީ މުދާތައް ރާއްޖެ ގެނެސް އެފަދަ ތަކެތީގެ އަގުތައް ބާޒާރުގައި ކޮންޓްރޯލް ކުރުމަށް މުހިއްމު ދައުރެއް އަދާކުރާ ކުންފުންޏެކެވެ.

ރޯދަ މަހާ ދިމާކޮށް މިދިޔަ އަހަރު މިސަރުކާރުން ވަނީ ކޮންމެ ގޭބިސީއަކަށް ހިލޭ ކާޑުގެ ބާވަތްތައް ބަހާފަ އެވެ. އެގޮތުން ކޮންމެ ގެބިސީއަކަށް 10 ކިިލޯ ހަނޑޫ އަދި 10 ކިލޯ ފުށް ބަހާފައިވެ އެވެ. މިއާ ހިލާފަށް އަންނަ ރޯދަ މަހު ކޮންމެ ގޭބިސީއަކަށް ސަރުކާރުން ދޭން ނިންމާފައިވަނީ މަސް ކޭހެކެވެ.