ކުރިއަށް އޮތް ރަމަޟާން މަހު ވެސް ފެނާއި ކަރަންޓު ބިލުން ރައްޔިތުންނަށް ޑިސްކައުންޓް ދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނުކުރައްވައިފި އެވެ.

އއ. އަތޮޅުގެ ރައްތަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން މަތިވެރީގައި ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، މިދިޔަ ރަމަޟާން މަހު ބިލުތަކުން ޑިސްކައުންޓް ދެއްވި ފަދައިން މިއަންނަ ރަމަޟާން މަހުވެސް އެ ޑިސްކައުންޓް ދެއްވުމާއެކު، އިތުރު އެހީތެރިކަންވެސް ފޯރުކޮށްދެއްވާނެ ކަމަށެވެ.

ފާއިތުވި ރަމަޟާން މަހު ސަރުކާރުން ވަނީ ފެނާއި ކަރަންޓު ބިލުތަކަށް 142 މިލިއަން ރުފިޔާގެ ޑިސްކައުންޓެއް ދެއްވާފަ އެވެ. އަދި 82,000 ގޭބިސީއަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދެއްވާފައިވެ އެވެ.

"ވީހާވެސް ގިނަ އެހީތެރިކަން، ވީވަރަކުން ކަންކަމުގައި ޚަރަދުތައް ލުއިކޮށްދީގެން، އާމްދަނީ އިތުރުކުރެވޭނެ ގޮތް އަޅުގަނޑުމެން ހަދާނީ،" ރައީސް ވިދާޅުވި އެވެ.

މީގެ އިތުރުން ރައީސް ވަނީ ކޮންމެ ގޭބިސީއަކަށް ރޯދަ ހަދިޔާގެ ގޮތުގައި މަސްދަޅު ކޭހެއް ދެއްވުމަށްވެސް ނިންމަވާފަ އެވެ.

މިދިޔަ ރަމަޟާން މަހު ރާއްޖޭގެ ރައްޔިތުންނަށް ރޯދަ ހަދިޔާގެ ގޮތުގައި ދިނީ ކާޑުގެ ބާވަތްތަކެވެ. އެއީ 10 ކިލޯ ފުށާއި 10 ކިލޯ ހަނޑުލެވެ.