އިންޑިއާގެ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު، މުނޫ މަހާވަރު، ރައީސް ޑރ. މުހައްމަދު މުއިއްޒުގެ އަރިއަހަށް ވަދާއީ ޒިޔާރަތެއް ކުރައްވައިފި އެވެ.

އިންޑިއާގެ ސަފީރާއި އެކު ރައީސް މުޙައްމަދު މުއިއްޒު ރައީސް އޮފީހުގައި މިއަދު ހެނދުނު ބޭއްވި ބައްދަލުކުރެއްވުމުގައި ދެ ގައުމުގެ ގުޅުން ކުރިއެރުވުމަށް މަހާވަރު ދެއްވާފައިވާ އެހީތެރި ކަމަށް ރައީސް ޝުކުރު އަދާކުރެއްވި އެވެ.

ދެ ގައުމުގެ ގުޅުން ކުރިއެރުވުމަށް މަހާވަރު ދެއްވާފައިވާ އެހީތެރި ކަމަށް ރައީސް ޝުކުރު އަދާކުރެއްވިއިރު، އެ ބައްދަލުވުމުގައި މަހާވަރު ވަނީ ރާއްޖޭގެ ތަރައްގީއަށް އިންޑިއާގެ އެހީތެރިކަން އަބަދުވެސް ލިބެމުންދާނެ ކަމުގެ ޔަގީންކަން ދެއްވާފަ އެވެ.

އަދި ދިމާވާ ގޮންޖެހުންތަކުން އަރައިގަތުމަށް ކުރާ މަސައްކަތްތަކުގައި ރާއްޖޭގެ ރައީސް ދައްކަވާ ލީޑާޝިޕާ އެކުގައި މަސައްކަތް ކުރުމުގެ ރޫހު އިސްކުރައްވާކަން ފާހަގަކުރައްވާ މަހާވަރު ވިދާޅުވީ އެކަމުގެ ސަބަބުން ދެ ގައުމުގެ ގުޅުން އިތުރަށް ވަރުގަދަކޮށްދޭ ކަމަށެވެ.

މަހާވަރު ވަނީ ދެ ގައުމުގެ ގުޅުން މިހާރު ކުރިއަށްދާ ގޮތުގައި ދެމިއޮންނާނެކަމާއި އިންޑިއާގެ އެހީގައި ރާއްޖޭގައި ހިންގާ މަޝްރޫއުތައް ވަގުތަށް ނިންމޭނެކަމުގެ ޔަގީންކަން ދެއްވާފަ އެވެ.

މަހާވަރު ރައީސްގެ އަރިހަށް ވަދާއީ ޒިޔާރަތެއް ކުރައްވާފައި މި ވަނީ ސަފީރު ކަމުގެ ދައުރުގެ މުއްދަތު ހަމަވުމާ ގުޅިގެން ގައުމަށް އެނބުރި ވަޑައިގަންނަވަން ތައްޔާރުވަމުން ގެންދާ ދަނޑިވަޅުގަ އެވެ.