ދުންފަތުގެ އިސްތިއުމާލު ކުރުމާ ދުރުވާން ބޭނުންވާ މީހުންނަށް އެހީތެރިކަން ފޯރުކޮށްދިނުމުމުގެ ގޮތުން ސެޒޭޝަންގެ ހިދުމަތް ދިނުމަށް ކުރަމުން އަންްނަ މަސައްކަތުގެ ތެރެއިން ހިދުމަތް ބޭނުންވާ ފަރާތްތަކަށް ހާއްސަކޮށް ކުއިޓް ލައިންގެ ހިދުމަތް ފަށަން ނިންމައިފި އެވެ.

މިކަން ހާމަކޮށްފައި ވަނީ ދުންފަތް ކޮންޓްރޯލް ކުރުމަށް ސަރުކާރުން އަޅުއްވަން ނިންމި ފިޔަވަޅުތަކާ ބެހޭގޮތުން މައުލޫމާތު ދިނުމަށް ހެލްތު މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގަ އެވެ.

ހެލްތު މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ސެޒޭޝަންގެ ހިދުމަތް ފަސޭހައިން ލިބޭނެ ގޮތް ހެދުމަށް ކުއިޓް ލައިންއެއް މިހާރު ގާއިމުކުރެވިފައިވާ ކަމަށެވެ. އަދި މިއީ 24 ގަޑިއިރު ހިދުމަތް ލިބޭނެ ގޮތަށް ގާއިމުކުރެވިފައިވާ ކުއިޓް ލައިނެއްކަމަށާއި މި ޑިސެމްބަރު މަހުގެ 8 ވަނަ ދުވަހު، އާދިއްތަ ދުވަހުން ފެށިގެން މި ކުއިޓް ލައިންގެ ހިދުމަތް އެޗްޕީއޭ މެދުވެރިކޮށް ދޭނެ ކަމަށް އޭނާ ވިދާޅުވި އެވެ.

ނާޒިމް ވިދާޅުވީ އެ ކުއިޓް ލައިންގެ ނަމްބަރަކީ 1676 ކަމަށެވެ.

ސެޒޭޝަންގެ ހިދުމަތަކީ ދުންފަތުގެ އިސްތިއުމާލު ކުރުމާ ދުރުހެލިވާން ބޭނުންވާ މީހުންނަށް އެހީތެރިކަން ފޯރުކޮށްދިނުމުގެ ގޮތުންދޭ ފަރުވާއެކެވެ.

މިނިސްޓަރު އިތުރަށް ވިދާޅުވި ގޮތުގައި ދުންފަތާ ދުރުވާން ބޭނުންވާ މީހުންނަށް ބޭނުންވާ ނިކޮޓިން ޕެޗާއި ގަމް އަދި އެހެނިހެން ފަރުވާތައް އާސަންދަ މެދުވެރިކޮށް ލިބޭނެ އިންތިޒާމު ސަރުކާރުން މިހާރު ހަމަޖައްސާފައިވާ ކަމަށެވެ.

ދުންފަތާ ދެކޮޅަށް ސަރުކާރުން ކުރަމުންދާ މަސައްކަތްތައް ރޭވުންތެރިކަމާއެކު ނަތީޖާ ނެރެވޭނެހެން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ރައީސްގެ ނިންމެވުމަކުން 5 އަހަރު ދުވަހުގެ ޕްލޭނެއް އެކުލަވާލުމުގެ މަސައްކަތް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާ ގުޅިގެން ކުރަމުން އަންނަ ކަމަށް ވެސް ނާޒިމް ވިދާޅުވި އެވެ.

ޕްލޭން އެކުލަވާލުމުގައި ކަމާ ބެހޭ އިދާރާތަކުގެ އިތުރުން ރައްޔިތުންގެ ހިޔާލާއި ބައިވެރިވުން ހޯދުމަށް ކުރަން ޖެހޭ ކަންކަން ހެލްތު މިނިސްޓްރީން ކުރަމުންދާކަން ފާހަގަކުރައްވާ ނާޒިމް ވިދާޅުވީ ކައުންސިލުތަކުން އިސްނަގައިގެން ރަށު ފެންވަރުގައި އަދި އަތޮޅު ފެންވަރުގައި ހިންގާ ދުންފަތް ކޮންޓްރޯލް ކުރުމުގެ މަސައްކަތަށް ސަރުކާރު ހިންގުމުގެ ނިޒާމުގެ ތެރެއިން އެހީތެރިކަން ފޯރުކޮށްދޭނެ ކަމަށެވެ.

ދުންފަތުގެ އިސްތިއުމާލު ކުރުމާ ދުރުވާން ބޭނުންވާ ފަރާތްތަކަށް ބޭނުންވާ ބޭސް އެސްޓީއޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލުތައް ގާއިމުކޮށްފައިވާ ރަށްތަކުން ލިބޭނެ އިންތިޒާމު ހަމަޖައްސަން ވަނީ ނިންމާފަ އެވެ.

ސެޒޭޝަންގެ ހިދުމަތް ރާއްޖޭގެ ހުރިހާ ސަރަހައްދަކުން ލިބޭނެ ގޮތް ހަމަޖެއްސުމަށް ކެބިނެޓުގެ ލަފައާއެކު މިދިޔަ އޮކްޓޫބަރު މަހުގެ 17 ވަނަ ދުވަހު ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.