ސްޓެލްކޯއިން ވަކިކުރި މުވައްޒަފުންގެ އަދަދު ހާމަކޮށްފިނަމަ ފޫނުބެއްދޭވަރުގެ ގެއްލުމެއް އެ ކުންފުންޏަށް ލިބޭނެ ކަމަށް ސްޓެލްކޯއިން ބުނެފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހުށަހެޅި އާރްޓީއައި އަށް ސްޓެލްކޯއިން ދިން ޖަވާބުގައި ވަނީ ދައުލަތުގެ އިދާރާއެއްގެ ގާނޫނީގޮތުން ސައްހަ ވިޔަފާރީގެ މަސްލަހަތަކަށް ނުވަތަ މާލީ މަސްލަހަތަކަށްޓަކައި މައުލޫމާތު ދޫކުރުމުން ފޫނުބެއްދޭފަދަ ގެއްލުމެއް ފޯރާނެ މައުލޫމާތެއް ދޫނުކުރުމުގެ އިޚްތިޔާރު އެ ގާނޫނުގެ 30 ވަނަ މާއްދާއިން ދައުލަތުގެ އިދާރާއަށް ލިބިގެންވާ ކަމަށެވެ.

ކުންފުނިން ވަކިކުރި މުވައްޒަފުންގެ އަދަދަކީ މުވައްޒަފުންނާ ގުޅުންހުރި މައުލޫމާތަކަށްވާއިރު، އެ މައުލޫމާތު ހާމަކޮށްފިނަމަ ފޫނުބެއްދޭވަރުގެ ގެއްލުމެއް އެ ކުންފުންޏަށް ލިބިދާނެ ކަމަށް ފެންނަ ކަމަށް ވެސް އެ ޖަވާބުގައިވެ އެވެ.

ކުންފުނިން ވަކިކުރި މުވައްޒަފުންގެ އަދަދަކީ ކުންފުނީގެ ވިޔަފާރި ކުރިއެރުވުމަށް ކުރާ އެންމެހައި މަސައްކަތާއި ކުންފުނީގެ ސިއްރުތަކާ ގުޅިފައިވާ މައުލޫމާތެއް ކަމަށް ވެސް އެ ޖަވާބުގައިވެ އެވެ.

އެހެންކަމުން އެ މައުލޫމާތު ހިއްސާކުރެވެން ނެތް ކަމަށް ސްޓެލްކޯއިން ބުންޏެވެ.

ސްޓެލްކޯއިން މި ދިން ޖަވާބާއި އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ޕީއެސްއެމްގެ ޕްރޮގްރާމެއްގައި ދާދިފަހުން ދެއްކެވި ވާހަކައަކާ ފުށޫއަރަ އެވެ.

ސަރުކާރަށް އެއް އަހަރު ފުރުން ފާހަގަކުރަން ޕީއެސްއެމަށް ދެއްވި އިންޓަވިއުއެއްގައި ފަހުމީ ވިދާޅުވީ މި ސަރުކާރު އައިފަހުން ސްޓެލްކޯގެ އެއްވެސް މުވައްޒަފަކު ވަޒީފާއިން ވަކިކޮށްފައިނުވާނެ ކަމަށެވެ. "ހުރިހާ" އިން ހޯދަން އެދުނީ ސްޓެލްކޯގެ ވަޒީފާއިން ވަކިކުރީ ކިތައް މުވައްޒަފުންތޯއެވެ. އެދިފައި ވަނީ ހަމައެކަނި ވަކިކުރި މުވައްޒަފުންގެ އަދަދު ހޯދުމަށެވެ.

ކަރަންޓް ބިލްތައް ބޮޑުކޮށް ކޮރަޕްޝަންގެ އަމަލުތައް ހިންގާ ކަމަށް ސްޓެލްކޯއަށް ގިނަ ބަޔަކު ތުހުމަތު ކުރަމުންދާއިރު، އެ ކުންފުނިން އަންނަނީ މައުލޫމާތުތައް ސިއްރުކޮށް، އެ ކުންފުންޏާ މެދު އެފަދަ ތުހުމަތުތައް ކުރެވޭނެ މަގުފަހިކުރަމުންނެވެ.