ހދ. އަތޮޅު ކައުންސިލުގެ ބަޖެޓުން ނުވަ ލައްކައަށް ވުރެ ގިނަ ރުފިޔާ ހަރަދުކޮށްގެން، ކައުންސިލްގެ ގިނަ އަދަދެއްގެ މެމްބަރުންނާއި މުވައްޒަފުން ތައިލެންޑުގެ ބެންކޮކަށް ދިޔަ މައްސަލައެއް ފެންމަތިވެ، އެކަމަށް ފިޔަވަޅު އަޅަން އޮޑިޓާ ޖެނެރަލް އަންގަވައިފި އެވެ.

އޮޑިޓް އޮފީހުން އިއްޔެ އާންމުކުރި އޮޑިޓް ރިޕޯޓެއްގައި ބުނީ ހދ އަތޮޅުން ކައުންސިލުގެ ބަޖެޓުން 952،885ރ ހަރަދުކޮށްގެން މިދިޔަ އަހަރު އޮކްޓޯބަރު މަހު ތައިލެންޑުގެ ބެންކޮކަށް ތަޖުރިބާ އާއި ތަމްރީނު ހޯދުމަށް 10 ދުވަހުގެ ދަތުރެއްގައި އެ ކައުންސިލްގެ ބައެއް މެމްބަރުންނާއި މުވައްޒަފުން ދިޔަ ކަމަށެވެ. އެ ދަތުރުގައި 13 ކައުންސިލަރުންނާއި ސެކްރެޓަރީ ޖެނެރަލް އަދި ސީނިއާ މެނޭޖުމަންޓްގެ ހަ ބޭފުޅުން ހިމެނޭ ގޮތަށް ޖުމްލަ 20 މީހުން ބައިވެރިވި ކަމަށް އެ ރިޕޯޓުގައިވެ އެވެ.

މި ދަތުރުން ހާސިލްކުރަން ބޭނުންވާ ކަންކަމާއި މި ދަތުރުން ލިބޭ ތަޖުރިބާ ކައުންސިލްތަކުގައި ބޭނުންކުރާނޭ ގޮތެއް ދަތުރުކުރުމުގެ ކުރިން ކަނޑައަޅާފައިނުވުމުން މި ދަތުރުން ހާސިލްކުރަން ކުރިން ރާވާފައި ވަނީ ކޮންކޮން ކަންތައްތަކެއް ކަން ސާފުކޮށް އެނގެން ނެތްކަމަށް އޮޑިޓް ރިޕޯޓުގައި ބުނެފައިވެ އެވެ.

ކައުންސިލުގެ ދަތުރު ރިޕޯޓްގައި އެ ދަތުރުގެ މަގުސަދަކީ ތައިލެންޑުގެ އެކިއެކި ކަންކަމާ ގުޅޭގޮތުން ތަޖުރިބާ ހޯދުމާއި އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލެންޑުގެ އިންވެސްޓަރުން ހޯދުމަށް މަގުފަހިކުރުމުގެ އިތުރުން ގުޑް ގަވަނަންސާއި ޕަބްލިކް ޕޮލިސީ އަދި ރޫރަލް ޑިވެލޮޕްމަންޓްގެ ދާއިރާތަކުން ތަޖުރިބާ އާއި މައުލޫމާތު ހޯދުން ކަމަށް ބަޔާންކޮށްފައިވާ ކަމަށް އޮޑިޓް ރިޕޯޓުގައި ބުންޏެވެ.

ނަމަވެސް ދަތުރު ނިމި އަހަރެއް ވީއިރު، ހދ އަތޮޅުގެ އެއްވެސް ރަށެއްގައި މި ދަތުރުން ހޯދުނު ތަޖުރިބާ އާއި ފަންނީ ކުރިއެރުމުގެ ބޭނުންކޮށްގެން އެއްވެސް މަޝްރޫއެއް ފަށާފައި ނުވާ ކަން ރިޕޯޓްގައި ފާހަގަކޮށްފައިވެ އެވެ. ކައުންސިލަށް ލިބުނު އާމްދަނީ އާއި ސަރުކާރުން ދިން ބަޖެޓުގެ ބޮޑު އަދަދެއް މި ދަތުރަށް ހަރަދުކޮށްފައިވާކަމަށް އޮޑިޓް ރިޕޯޓުގައި ބުނެފައިވެ އެވެ.

މީގެ އިތުރުން ދަތުރުތަކަށް އެ ކައުންސިލަށް ހަމަޖެއްސި އަދަދަށް ވުރެ ގިނައިން ހަރަދު ކޮށްފައިވާކަން ވެސް އޮޑިޓް ރިޕޯޓުގައިވެ އެވެ. އެ ކައުންސިލުން ދަތުރުތައް ކުރުމަށް މިދިޔަ އަހަރުގެ ބަޖެޓުގައި ހިމަނާފައި ވަނީ 651،572ރ. އެވެ. ނަމަވެސް ބެންކޮކް ދަތުރަށް ކުރި ހަރަދާއެކު ބަޖެޓް ކުރިވަރަށް ވުރެ 300،000 އަށް ވުރެ ގިނަ ރުފިޔާ އިތުރަށް ހަރަދުކޮށްފައިވާކަން ވަނީ ހާމަވެފަ އެވެ.

ހދ. އަތޮޅު ކައުންސިލުން މި ދަތުރު ކޮށްފައިވަނީ ފިނޭންސް މިނިސްޓްރީން ކަނޑައަޅާފައިވާ އުސޫލާ ހިލާފަށް ކަމަށް ވާތީ، ކައުންސިލްގެ ހަރަދުތަކަށް ޒިންމާވާ ފަރާތަށް ފިޔަވަޅު އަޅަން އޮޑިޓް އޮފީހުން ވަނީ ފިނޭންސް މިނިސްޓްރީއަށް އަންގައިފަ އެވެ.