މާލެ ސަރަހައްދުގައި ހުރި ފުޓްސަލް ދަނޑުތައް، ސަރުކާރުގެ ބެލުމުގެ ދަށަށް ނަގައި ލިބޭ އާމްދަނީ، ކުޅިވަރު ގާނޫނުގެ ތެރެއިން ވުޖޫދުވާ ސްޕޯޓްސް ފަންޑަށް ނަގާ ގޮތަށް ބަދަލުކުރައްވާނެކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.

މިނިސްޓަރު ރާފިއު މިހެން ވިދާޅުވީ ރައްޔިތުންގެ މަޖިލީހަށް ހުށަހެޅިފައިވާ ކުޅިވަރު ގާނޫނުގެ އިސްލާހުގައި ހުރި ކަންކަން ދިރާސާ ކުރުމަށް، އިޖުތިމާއީ ކޮމިޓީން ބޭއްވި ބައްދަލުވުމުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

އެ ގޮތުން މާލޭގައި ހުރި ފުޓްސަލް ދަނޑުތައް ގްރޫޕްތަކުން ނޫނީ ކްލަބްތަކުން ކޮންޓްރޯލްކޮށް، އެތަންތަނުން މާލީ މަންފާ ހޯދާއިރު، އެ ފަދަ ކަންކަން ފުރަތަމަ ޑިވިޝަނުގެ ކްލަބްތަކަށް ނެތީ ކީއްވެތޯ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު، މުހައްމަދު މުސްތަފާ ވަނީ ކޮމިޓީ ބައްދަލުވުމުގައި ސުވާލު ކުރައްވާފަ އެވެ.

ސުވާލަށް ޖަވާބު ދެއްވަމުން ރާފިއު ވިދާޅުވީ، މި ދަނޑުތައް ގްރޫޕްތަކަށް ދެވިފައި ހުރީ، އެއްވެސް އުސޫލެއް ނެތި ކަމަށާއި މި ކަމަކީ، ކުރީ ސަރުކާރުތަކުން މި ސަރުކާރަށް ވާރުތަވެފައި އޮތް މައްސަލައެއް ކަމަށެވެ.

އެހެންކަމުން ސަރުކާރުގެ ވިސްނުމަކީ އެ ދަނޑުތައް މިހާރު ހިންގާ ގްރޫޕްތަކަށް ނޫނީ ކްލަބްތަކަށް ވެސް ބޭނުންކުރެވޭ ގޮތަށް ސިސްޓަމެއްގެ ތެރެއިން، މި ދަނޑުތައް އާއްމުންނަށް ފަސޭހައިން ލިބޭ ގޮތަށް ހަދައި ހަދައިދިނުންކަމަށާއި އަދި، މި ދަނޑުތަކުން ކުއްޔަށް ލިބޭ ފައިސާ ސަރުކާރުގެ ކުޅިވަރު ފަންޑަށް ލިބޭނެ ނިޒާމެއް އެކުލަވާލުން ކަމަށް އޭނާ ވިދާޅުވި އެވެ.