ދައުލަތުގެ ބަންޑާރަނައިބުގެ އޮފީސް ( އެޓާނީ ޖެނެރަލްގެ އޮފީސް) ދިވެހި ސިވިލް ސަރވިސް އިން ވަކިކޮށް ވަކި ސާރވިސްއެއްގެ ގޮތުގައި ހަމަޖައްސަން އާ ޤާނޫނެއް ހަދަނީ އެ އޮފީސް ސިޔާސީ ކުރަން ކުރަންކަމަށް އިދިކޮޅު އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު މިއަދު ވިދާޅުވެއްޖެ އެވެ.

އިއްޔެ މަޖިލީހުގެ ތަޅުމަށް ހުށަހެޅުނު ބިލުގެ އިބްތިދާއީ ބަހުސް މިއަދުގެ ޖަލްސާގައި ވަނީ ބާއްވާފަ އެވެ. މި ބަހުސްގައި ވާހަކަ ދައްކަވަމުން ޝަމްހީދު ވިދާޅުވީ އެންމެ ފުރަތަމަ ވެސް ބަލަން ބޭނުންވަނީ މި ބިލު ކުއްލިއަކަށް މަޖިލީހަށް ފޮނުވި ސަބަބު ކަމަށެވެ. އެ ބިލުގައި އިތުރަށް ބަންޑާރަނައިބަށް ލިބިގެންދާ ބާރުތަކެއްވާ ކަމަށާއި، އެބާރުތަކުގެ ތެރޭގައި ބަންޑާރަނައިބަށް އެ އޮފީހަށް މުވައްޒަފުން އައްޔަނުކުރުމާއި، އޮނިގަނޑު އެކުލަވާލުމުގެ އިތުރުން މުވައްޒަފުންގެ އިނާޔަތްތައް ކަނޑައެޅުމުގެ ބާރުވެސް ލިބިދޭ ކަމަށް ޝަމްހީދު ވިދާޅުވި އެވެ.

އޭނާ ވިދާޅުވީ، މި ބިލުގެ ސަބަބުން ދިވެހިރާއްޖޭގެ އެންމެ ޒިންމާދާރު އެއް މުއައްސަސާ ކަމަށްވާ ބަންޑާރަނައިބުގެ އޮފީހަކީ އެންމެ މީހެއްގެ މުއައްސަސާއަކަށް އެއްކޮށް ބަދަލުކޮށްލުމުގެ ފުރުސަތު ލިބޭކަމަށެވެ. އަދި އެހެން ވެއްޖެ ނަމަ ކޮންމެ ފަސް އަހަރަކުން ފެނިގެންދާނީ އާ ބަންޑާރަނައިބުގެ އޮފީހަކާއި މުޅިން އާ މުވައްޒަފުންތަކެއް ކަމަށް ޝަމްހީދު ވިދާޅުވި އެވެ. އަދި މިކަމުގެ ސަބަބުން މުޅި އޮފީސް ސިޔާސީވުން އެކަށީގެންވާ ކަމަށެވެ.

އަދި ރިކަރަންޓް ހަރަދު ބޮޑު ވާހަކަ އަބަދު ދައްކާއިރު މި ބިލުގެ ސަބަބުން އަންނަ މުސާރައިގެ ބަދަލުތަކުގެ ސަބަބުން ދައުލަތަށް އިތުރަށް ހަރަދު ބޮޑުވާނެކަމަށް އޭނާ ވިދާޅުވި އެވެ.