ހޮލީވުޑަށް ތައާރަފްވި ދުވަސްވަރު އޭނާގެ ބުރުސޫރައަށް ގިނަ ބައެއްގެ ފާޑުކިޔުން އަމާޒުވި ކަމަށާއި އެއީ ދަތި އުނދަގޫ ދުވަސްތަކެއް ކަމަށް ހޮލީވުޑްގެ މަޝްހޫރު ތަރި ކޭޓް ވިންސްލެޓް ބުނެފި އެވެ.

ސީބީއެސް ނިއުސްއަށް ދިން އިންޓަވިއުއެއްގައި ކޭޓް ބުނީ ހޮލީވުޑްގައި ރީތިކަމުގެ ވަކި މިންގަނޑުތަކެއް ހުންނަ ކަމަށާއި އެ މިންގަނޑުތަކަށް ނުފެތޭނަމަ ފުރައްސާރަ އަމާޒުވާ ކަމަށެވެ. އެގޮތުން ހޮލީވުޑަށް ވަތް ފުރަތަމަ ދުވަސްވަރު އޭނާ ފަލަވެގެން ގިނަ ބައެއްގެ ފާޑުކިޔުން އަމާޒުވި ކަމަށާއި އެކަމުގެ ސަބަބުން އަމިއްލަ ނަފްސަށް ކުރާ އިތުބާރަށް ވެސް ލޮޅުން އެރި ކަމަށެވެ.

"އަހަންނަކީ އޭރު އަލަށް ނުކުތް އެކްޓަރެއް. އަހަރެން ފަލައެއް ވެސް ނުވާނެ. އެކަމަކު ވެސް މީހުންގެ ފުރައްސާރަ އަމާޒުވި،" ކޭޓް ބުންޏެވެ.

ކޭޓްގެ ބަރުދަން ލުއި ނުކޮށްފިނަމަ ކުޅެން ލިބޭނީ "ހަމައެކަނި ފަލަ މީހުންގެ ރޯލުތައް" ކަމަށް ޑްރާމާ ޓީޗަރަކު ވެސް ބުނި ކަމަށް ކޭޓް ބުންޏެވެ.

އެ ފުރައްސާރައާ ކުރިމަތިލަނީ ކިހިނެއްތޯ ސުވާލު ކުރުމުން ކޭޓް ބުނީ އެންމެ މޮޅު ގޮތަކީ އެކަމަށް އަޅާނުލައި އަމަލުން އޭނާގެ ހުނަރު ސާބިތުކޮށްދިނުން ކަމަށެވެ.

ކޭޓް މަޝްހޫރުވެފައިވަނީ 1997 ވަނަ އަހަރު ނުކުތް ކްލެސިކް ފިލްމު "ޓައިޓޭނިކް"ގެ ލީޑު ރޯލު ކުޅުނު އެކްޓްރެސްގެ ގޮތުގަ އެވެ.