2021 ވަނަ އަހަރު މުޅި ދުނިޔެ ސިއްސުވާލި އެއް ހަބަރަކީ ސޯޝަލް މީޑިއާގައި ހިނގި ހަމަނުޖެހުމެއްގެ ސަބަބުން އުމުރުން 14 އަހަރުގެ ކުޑަ ކުއްޖަކު މަރާލެވުނު ހަބަރެވެ.

އެ ހާދިސާއާއެކު އުމުރުން 16 އަހަރުން ދަށުގެ ކުދިން ސޯޝަލް މީޑިއާ ބޭނުން ކުރުމުގައި ބައެއް ގައުމުތަކުން ހިފެހެއްޓުންތައް ކަނޑައަޅަން ފެށި އެވެ.

އެގޮތުގެ މަތިން އެންމެ ފަހުން އެކަން މަނާކުރި ގައުމަކީ އޮސްްޓްރޭލިއާ އެވެ. އޮސްޓްރޭލިއާގެ އެ ނިންމުމާއެކު ސޯޝަލް މީޑިއާއަށް ފުރާނަ ގެއްލުނު އޮލީ ސްޓީފަންސްގެ ބައްޕަ ސްޓުއާޓް ސްޓީފަންސް މިވަނީ އޭނާގެ ޝުއޫރުތައް ފާޅުކޮށްފަ އެވެ.

ސްޓުއާޓް ބުނީ އިނގިރޭސި ވިލާތުގައި ފުރާވަރުގެ ކުދިން ސޯޝަލް މީޑިއާ ބޭނުން ކުރުމަށް އަދިވެސް އެދެވިގެންވާ ފިޔަވަޅުތަކެއް އެޅިފައިނުވާ ކަމަށެވެ.

ނަތީޖާއެއްގެ ގޮތުން އެ ކުދިން އުމުރާ ނުގުޅޭ މަންޒަރާއި އަޑަށް ހުށައެޅި މުޖުތަމައުގައި ކުށް ކުރަން މަގުފަހިވާ ކަމަށް ވެސް އޭނާ ބުންޏެވެ.

އެއާއެކު ސްޓުއާޓް ވަނީ މައިންބަފައިން ވެސް ފުރާވަރު ދަރިން ސޯޝަލް މީޑިއާއަށް ތައާރަފް ކުރުމުގައި ސަމާލު ވުމަށް ގޮވާލާފަ އެވެ.

ސްޓުއާޓްގެ ދަރިފުޅު އޮލީ މަރާލާފައިވަނީ ސޯޝަލް މީޑިއާގައި އުފެދުނު ހަމަނުޖެހުމެއްގެ ސަބަބުން އުމުރުން 16 އަހަރުން ދަށުގެ ދެ ކުދިން ވެގެންނެވެ.