ހުދުކުލައިގެ މަލަކާއި ބޮޑެތި އޯވަލް އޮފްފެހި ކުލައެއްގެ ފަތްތަކެއް ލިބިފައިވާ ޕީސް ލިލީއަކީ ގޭތެރޭގައި ހައްދާލަން ވަރަށް ހިތްގައިމު ގަހެކެވެ. ވައި ސާފުކޮށްލަން ވެސް ކަމުދާ ޕީސްލިލީއަކީ ލޯމެއިންޓެނަންސް ނުވަތަ މާބޮޑަށް އަޅާލަން ނުޖެހޭ ގަހެކެވެ. މިގަސް އެންމެ ރީތިކޮށް ހެއްދޭނީ ގަދައަށް އަވި ނުލިބޭ ކުޑަދޮރެއް ކައިރީ ބައިންދާނަމަ އެވެ. ލިލީ ކިއުނު ކަމުގައި ވިއަސް ޕީސް ލިލީއަކީ ލިލީ ފެމިލީއަށް ނިސްބަތްވާ ގަހެއް ނޫނެވެ.
ކުޑަ ޕީސްލިލީ ގަހެއް ބޮޑުވުމަށް ގާތްގަނޑަކަށް ތިން އަހަރު ނަގަ އެވެ. ޕީސް ލިލީ ގަހުގައި އާންމުކޮށް މާއަޅަނީ އަހަރަކު ދެފަހަރު އެވެ. އެހެންކަމުން އެގަސް އާމުކޮށް ހެދޭ ސަރަހައްދާ ދުރުކުރުމުން މާ އަޅުވަން އުނދަގޫވެ އެވެ. ނަމަވެސް ޕީސް ލިލީ މާއެޅުވުމަށް ފަސޭހަކުރުމަށްޓަކައި ވައިގެ ތެތްފިނިކަން ވަކިމިނެއްގައި ހިފެހެއްޓުމާއި، އަލިމަޑުވުމާއި ގަވައިދުން ކަސްކާނާ އެޅުން މުހިންމެވެ.
ޕީސް ލިލީ މާ ހަތަރު ސްޓޭޖެއް ކަޑައްތު ކުރެ އެވެ. އެއީ ނުފޮޅޭ މަލާއި، ފޮޅިފައިވާ މަލާއި، އޮށް ނިކުންނަ ސްޓޭޖަކާއި، އަދި މޯޅިވާ ސްޓޭޖެވެ. ނޮފެޅޭ މަލެއް ފެނިއްޖެނަމަ، މާފޮޅުން އަވަސް ކުރުމަށް ކުރެވިދާނެ ބައެއް ކަންކަމަކީ މާ ބޮޑަށް އަވި ނުލިބޭ ދިމާލަކަށް ގަސް ބަދަލުކުރުމާއި، ކުޑަކޮށް ފެން ދިނުމާއި އަދި ގަސްކާނާ އެޅުމެވެ.
ޕީސް ލިލީ ގަހަށް ގިނައިން ފެންދެވޭކަން ބަލާނީ ކިހިނެތް؟
ފަތްތަކުގެ ކޮޅު މުށިކުލައަށް ނުވަތަ ރީނދޫ ކުލައަށް ބަދަލު ވުމަކީ ޕީސް ލިލީގައި ވަރަށް އާންމު ކަމެކެވެ. މިހެން ދިމާވަނީ މާގިނައިން ނުވަތަ މާމަދުން ފެން ދެވޭތީ އެވެ، ފެން ފޭދޭނެ ގޮތެއް ނެތި ގަހުގެ ބުޑުގައި ފެން ހަރުލާނަމަވެސް ފަތްތަކުގެ ކުލަ ބަދަލުވާން ދިމާވެ އެވެ.
ދެވަނަ ކަމަކީ ވެލިގަނޑުން ނުބައިވަސް ދުވުމެވެ. ޕީސް ލިލީ ގަހުގެ ފަތްތައް ރީނދޫވެފައިވާނަމަ އެއީ ގިނައިން ނުވަތަ މަދުން ފެން ލިބޭކަމުގެ އަލާމާތެކެވެ. ފްލޮރައިޑް އަދި ކްލޮރިން ހިމެނޭ ފެން ގަހަށް އެޅުމުންވެސް މިމައްސަލަ ނުކުމެ އެވެ.
މިގަހަށް ދޭން އެންމެ ރަނގަޅު ފެނަކީ މިނަރަލްސް އެކުލެވިގެންވާ އިސްކުރު ފެނުގެ ބަދަލުގައި މިނަރަލްސް ނުހިމެނޭ ޑިސްޓިލްޑް ފެނެވެ.
ފަތްތައް ކާލް ނުވަތަ ގުދުލަފައި ހުންނަނަމަ، އެއީ މާބޮޑަށް އަވި ލިބޭކަމުގެ ނިޝާނެކެވެ.
ޕީސް ލިލީގަސް ގިނަ ކުރުމަށްޓަކައި މައިގަސް ކައިރީގައި ހެދިފައި ހުންނަ ކުދި ނިރު ހޯދާށެވެ. މިކަން ކުރުމަށް ވެލިގަނޑުން މައިގަސް އުފުރާލާފައި ކުދި ގަސް ވަކިކުރެވިދާނެ އެވެ. ނުވަތަ ޕޮޓުން ވަކިނުކޮށް ވެސް ކުދިގަސްތައް މައިގަހާ ވަކި ކުރެވިދާނެ އެވެ. ވަކިކުރާނީ މޫކޮޅަކާ އެއްކޮށެވެ. އެއަށްފަހު ހެޔޮވަރު ޕޮޓެއްގައި އިންދާށެވެ.
ޕީސްލިލީ ރަނގަޅަށް ބަލަހައްޓައިފި ނަމަ، މިގަހުގެ އުމުރަކީ ގާތްގަނޑަކަށް 20 އަހަރެވެ.
