ރާއްޖޭގައި މަސައްކަތް ކުރާ އިންޑިއާ މީހުންގެ މުސާރަ އެ ގައުމަށް ފޮނުވުމުގައި ދަތިތަކެއް ކުރިމަތިވެފައިވާ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން މިއަދު ބުނެފި އެވެ.

އިންޑިއާގެ ގާނޫނު ހަދާ މަޖިލިސް، ލޮކް ސަބާގައި މެމްބަރަކު ކުރެއްވި ސުވާލަކަށް ލިޔުމުން ފޮނުވި ޖަވާބުގައި އެ މިނިސްޓްރީން ބުނީ އެ މައްސަލަ ދިމާވަނީ ރާއްޖެއިން ޑޮލަރު ފޮނުވުމުގައި ދަތިތަކެއް ހުރުމުން ކަމަށެވެ.

އެ މައްސަލަ އެ މިނިސްޓްރީގެ ސަމާލުކަމަށް އައިސްފައިވާތީ އެކަން ހައްލުކުރުމުގެ މަސައްކަތް ކުރަމުން އަންނަ ކަމަށް އެ މިނިސްޓްރީން ބުންޏެވެ.

ރާއްޖޭގެ ބޭންކުތަކަށް މަރުކަޒީ ބޭންކް، އެމްއެމްއޭ އިން ޑޮލަރު ފޯރުކޮށްދިނުމުގައި ލިމިޓެއް ގެންގުޅޭތީ، ރެމިޓެންސްގެ ގޮތުގައި ހުރިހާ ގައުމަކަށް ވެސް ޑޮލަރު ފޮނުވުމުގައި ދަތިތައް އެބަހުރި ކަމަށް އެ މިނިސްޓްރީން ބުންޏެވެ.

އެ މިނިސްޓްރީން ބުނީ އިންޑިއާގެ ރައްޔިތުންގެ ތެރެއިން ޑޮލަރުން މުސާރަ ލިބޭ މީހުންނަށް އެ މައްސަލަ ދިމާ ނުވާ ކަމަށެވެ.

އިންޑިއާގެ ރައްޔިތުންނަށް ލިބޭ މުސާރަ، އަނބުރާ އެ ގައުމަށް ފޮނުވަން ދިމާވާ ދަތިތަކާ ގުޅިގެން އެމްއެމްއޭއާ އެކު ވާހަކަ ދައްކައި، އެހީތެރިވެވޭނެ ގޮތްތަކެއް ބަލަމުން އަންނަ ކަމަށް ވެސް އެ މިނިސްޓްރީން ބުންޏެވެ.

ރާއްޖޭގައި ހުންނަ އިންޑިއާ ހައި ކޮމިޝަނުން އެ މައްސަލަ އެމްއެމްއޭގެ ސަމާލުކަމަށް ވެސް ގެނެސްފައިވާ ކަމަށް އެ މިނިސްޓްރީން ބުންޏެވެ.

އެމްއެމްއޭގެ ޑޮލަރުގެ ރިޒާވް މައްސަލަ ހައްލު ކުރުމަށް ރިޒާވް ބޭންކް އޮފް އިންޑިއާ (އާރްބީއައި) އިން ވަނީ 400 މިލިއަން ޑޮލަރުގެ ކަރެންސީ ސްވޮޕް ފެސިލިޓީއެއް އެމްއެމްއޭއާއެކު ހަދާފަ އެވެ.