ހޮލީވުޑްގެ މަޝްހޫރު ދެ ތަރިން ކަމަށްވާ ބްރެޑް ޕިޓްއާއި އެންޖެލީނާ ޖޯލީއާ ދެމެދު ކުރިއަށްދާ "ގާނޫނީ ހަނގުރާމަ"އިގައި އެންޖެލީނާއަށް އިތުރު މޮޅެއް ލިބިއްޖެ އެވެ.

މީގެ ކުރިން ކައިވެނި ކޮށްގެން އުޅުނު އެ ދެމީހުން ހިއްސާވާ ވައިނަރީއެއްގެ މިލްކިއްޔާތާ ގުޅޭ މައްސަލައެއް ކޯޓުގައި މިހާރު ކުރިއަށްދާއިރު އެ މައްސަލައިގެ ތެރެއިން ބްރެޑް އެންޖެލީނާއަށާއި އެމީހުންގެ ދަރިންނަށް ގެވެށި އަނިޔާ ކޮށްފައިވާ ކަމަށް ދައުވާ ކުރެވުނެވެ.

އެކަން ޝަރީއަތަށް ފެންމަތިވެ މީޑިއާގެ ފަލަ ސުރުހީތަކުން ޖާގަ ހޯދާފައިވާއިރު އެ ދެމީހުން ކައިވެނި ކޮށްގެން އުޅުނު ދުވަސްވަރު އެންޖެލީނާއަށާއި އެމީހުންގެ ދަރިންނަށް ގެވެށި އަނިޔާކުރި ކަމަށް ގަބޫލު ކުރެވޭނެ ފަދަ ހެކިތައް ވަނީ ހުށައެޅިފަ އެވެ.

މި ހެކިތަކަށް ބަލައި ޝަރީއަތުގެ މަޖިލީހުން ވަނީ މިކަމުގައި ބްރެޑްގެ ކުށެއް ނެތްކަން ސާބިތު ކުރަން ޝަރީއަތަށް ހެކި ހުށައަަޅަން އޭނާއަށް އަންގާފަ އެވެ.

ޝަރީއަތުގެ މި ނިންމުމަކީ އެންޖެލީނާއަށް ލިބުނު "މޮޅެއް"ގެ ގޮތުގައި އޭނާގެ ވަކީލުންނާއި ހުޅަނގުގެ މީޑިއާއިން ވެސް ދަނީ ސިފަ ކުރަމުންނެވެ.

މިކަމާ ގުޅިގެން ބްރެޑްގެ ސީދާ ބަހެއް ލިބިފައިނުވާއިރު އޭނާއާ ގާތް ފަރާތަކުން ބުނާ ގޮތުގައި ކޯޓުގެ އެ ނިންމުމަކީ އެއްވެސް އަސާސެއް ނެތް ނިންމުމެކެވެ.