ދެފުށް ފެންނަގޮތަށް ވެރިކަންކުރަން އައި މީހުންގެ ހާލަތު މާގޯސް ކަމަށް ވިދާޅުވެ ތަޖުރިބާކާރު ގާނޫނީ ވަކީލު އަދި ކެންދޫ ދާއިރާގެ ކުރީގެ މަޖިލިސް މެމްބަރު އަލީ ހުސައިން ސަރުކާރަށް ފާޑުވިދާޅުވެއްޖެ އެވެ.

ގެދޮރުވެރިޔާ ސްކީމްގެ ދަށުން ނިމިދިޔަ ސަރުކާރުން ހުޅުމާލޭގައި އިމާރާތްކޮށްފައިވާ 4000 ފްލެޓް ލިބޭ މީހުން ކަނޑައެޅުމުގައި މި ސަރުކާރުން އަމަލުކުރަމުންދާ ގޮތަށް ފާޑުވިދާޅުވެ އެކްސްގައި އަލީ ވިދާޅުވީ މިފެންނަނީ މި ސަރުކާރުންވެސް އަދުލުވެރިކަމާ އިންސާފުން ނެއްޓި އޮޔާދާތަން ކަމަށެވެ.

ޕީއެންސީއަށް ނިސްބަތްވާ މަޖިލިސް މެމްބަރުންތަކެއް ފްލެޓް ދޭން ބޭނުންވާ މީހުންގެ ލިސްޓްތަކެއް ހައުސިން މިނިސްޓްރީއަށް ފޮނުވާފައިވާކަން އެ މިނިސްޓްރީގެ އޮފިޝަލަކު "ހުރިހާ"އަށް ވަނީ ކިޔައިދީފަ އެވެ.

މިއީ ގަވާއިދާ ޚިލާފު ކަމަކަށްވާތީ މި ލިސްޓުތައް ފޮނުވާފައި ވަނީ ރަސްމީކޮށް ނޫނެވެ. ހައުސިން މިނިސްޓްރީގެ އޮފިޝަލަކު "ހުރިހާ"އަށް ވިދާޅުވީ އެކި މެމްބަރުން އެކި އަދަދުތަކުގެ ލިސްޓްތައް މިނިސްޓްރީއަށް ފޮނުވާފައިވާ ކަމަށެވެ. އެގޮތުން އެއް މެމްބަރަކު ފޮނުވި ލިސްޓްގައި ގާތްގަނޑަކަށް 100 ވަރަކަށް މީހުންގެ ނަން އެބައޮތް ކަމަށް އޮފިޝަލް ވިދާޅުވި އެވެ. އެއީ އެންމެ ގިނަ މީހުންގެ ނަން ހިމެނޭ ލިސްޓެވެ. ދެން ފޮނުވި ލިސްޓްތަކުގައި ހުރީ ގާތްގަނޑަކަށް 50 މީހުންގެ ނަމެވެ.

"މި ލިސްޓްތަކުގައި މާލޭގައި ދުވަހަކު ވެސް ދިރިނޫޅޭ މީހުންގެ ނަންތައް ވެސް ހިމަނާފައި އެބަވޭ،" އޮފިޝަލް ވިދާޅުވި އެވެ.

ހައުސިން މިނިސްޓަރު ޑރ. އަލީ ހައިދަރު އަހްމަދު މި މަހުގެ 14 ވަނަ ދުވަހު ވިދާޅުވީ ގެދޮރުވެރިޔާ ސްކީމުގެ ދަށުން އިމާރާތްކޮށްފައިވާ 4،000 ފުލެޓް ލިބޭ މީހުންގެ ލިސްޓު އެ ހަފްތާ ނިމުމުގެ ކުރީ ދުވަސް ކަމަށްވާ ހޮނިހިރު ދުވަހު އިއުލާން ކުރާނެ ކަމަށެވެ. ނަމަވެސް ހޮނިހިރު ދުވަހު ހައުސިން މިނިސްޓްރީން ވަނީ ފްލެޓް ލިސްޓް ނެރުން މުއްދަތެއް ނެތް ގޮތަށް ފަސްކޮށްފަ އެވެ. ސަބަބެއް ކަމަށް އެ މިނިސްޓްރީން ބުނީ ހުށަހަޅާފައިވާ އެޕްލިކޭޝަން ފޯމު ބެލުމުގައި ކަށަވަރު ކުރަން ޖެހޭ ގިނަ ކަންކަން ހުރުމުން އެ ކަމަށް އިތުރު ވަގުތު ބޭނުންވާތީ އެވެ.

އެ މިނިސްޓްރީގެ އޮފިޝަލް ވިދާޅުވީ ލިސްޓް ނެރުން މުއްދަތެއް ނެތްގޮތަށް ފަސްކުރީ މަޖިލިސް މެމްބަރުންގެ ފަރާތުން ލިބިފައިވާ ލިސްޓްތަކުގައިވާ ނަންތައް އެ ލިސްޓްގައި ހިމެނުމަށް އިތުރު ވަގުތު ބޭނުންވާނެތީ އެވެ.

"މަޖިލިސް މެމްބަރުންގެ ފަރާތުން ގިނަ ނަންތަކެއް ހިމެނޭ ލިސްޓްތަކެއް ދެއްތޯ ލިބިފަ ވަނީ. އެހެންވީމަ އެ ނަންތައް ލިސްޓަށް އެޑްކުރުމަށްޓަކައި އިތުރު ވަގުތު ބޭނުންވާނެ ނޫންތޯ،" އޮފިޝަލް ވިދާޅުވި އެވެ.

ނަމަވެސް ހައުސިން މިނިސްޓްރީގެ އިންފޮމޭޝަން އޮފިސަރު އަހްމަދު އިޒްމީމް ވަނީ އެކަން ދޮގުކޮށްފަ އެވެ.