އިލެކްޝަންސް ކޮމިޝަން (އީސީ)އާއި އެންޓި ކޮރަޕްޝަން ކޮމިޝަން (އޭސީސީ)އަށް ރައީސުލްޖުމްހޫރިއްޔާއަށް ނުފޫޒު ފޯރުވޭގޮތަށް ދެ ކޮމިޝަންގެ ގާނޫނަށް ވަކިވަކިން ގެނައި ދެ އިސްލާހު ރައީސް މުހައްމަދު މުއިއްޒު މިއަދު ތަސްދީގުކުރައްވައިފި އެވެ.

މި އިސްލާހާއި އެކު ރައްޔިތުންގެ ނިންމުންތަކާއި ކޮރަޕްޝަންގެ މައްސަލަތަކާއި ގުޅޭ މުހިއްމު ދެ މިނިވަން މުއައްސަސާކަމަށްވާ އީސީއާއި އޭސީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސަށް ލިބިގެން ދާނެ އެވެ.

ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން، ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅުއްވާނީ ރައީސުލްޖުމްހޫރިއްޔާ އެވެ. މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހެ އެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބުނެފައިވެ އެވެ.

މިހާރު ގާނޫނުގައި އޮންނަ ގޮތުން މި ދެ މުއައްސަސާއަށްވެސް ރައީސް އަދި ނައިބު ރައީސް އައްޔަނުކުރަނީ އެ ދެ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ.

އިލެކްޝަން ކޮމިޝަނުގެ ރައީސް އާއި ނައިބު ރައީސްގެ މަގާމުވެސް ވަނީ ހުސްވެފަ އެވެ. އަދި އޭސީސީގެ ނައިބު ރައީސް ވެސް ވަނީ އިއްޔެ އިސްތިއުފާ ދެއްވާފަ އެވެ. އީސީގެ ނައިބު ރައީސް އާއި އިތުރު މެންބަރަކު އިއްޔެ މަޖިލީހުން ވަކިކުރި އިރު، އީސީގެ ރައީސްގެ މަގާމުގައި ހުންނެވި ފުއާދު ތައުފީގުގެ ދައުރުވަނީ ހަމަވެފަ އެވެ.

އެހެންކަމުން އެ ދެ ކޮމިޝަނަށް ހަމަޖައްސަވާނީ ރައީސްއަށް ނުފޫޒު ފޯރުވޭވަރުގެ ބޭފުޅުންކަމަށް ބެލެވެ އެވެ.