ކައިވެނި ރޫޅުމަށްފަހު އާއްމުންގެ ފުރައްސާރައާ ކުރިމަތިލާން ޖެހުނު ކަމަށް އިންޑިއާގެ މަޝްހޫރު އެކްޓަރު ސަމާންތާ ރުތު ޕްރަބޫ ބުނެފި އެވެ.

"ގަލާޓާ"އަށް ދިން އިންޓަވިއުއެއްގައި ސަމާންތާ ވަނީ ކައިވެންޏަށްފަހު އޭނާގެ ހަޔާތަށް އައި ބަދަލުތަކާ ބެހޭ ގޮތުން ވާހަކަ ދައްކާފަ އެވެ. އެގޮތުން ކައިވެނި ރޫޅުމަށްފަހު އާއްމުންގެ އޭނާއަށް ހިތްދަތިވާ ކަހަލަ ފުރައްސާރަތައް އަމާޒުކުރި ކަމަށް ބުނަމުން ސަމާންތާ އިތުރަށް ބުނީ އަންހެނަކު ވަރިވުމަށްފަހު މުޖުތަމައުގައި އޭނާގެ އަގު ވެއްޓޭ ކަމަށެވެ.

"އަހަންނާ ދިމާއަށް ސެކަންޑް ހޭންޑް، ޔޫސްޑް އަދި ވޭސްޓަޑް ލައިފް ކަހަލަ ބަސްތަކުން ފުރައްސާރަ ކޮށްފައި އެބަހުރި،" ސަމާންތާ ބުންޏެވެ.

އެ ފުރައްސާރަތަކާއެކު އޭނާގެ އަމިއްލަ ނަފްސަށް އޮތް އިތުބާރު ކުޑަވެ އަމިއްލަ ނަފްސާމެދު ސުވާލު ކުރެވެން ފެށި ކަމަށް ވެސް ސަމާންތާ ބުނެފައިވެ އެވެ.

އެއާއެކު އޭނާ ބުނެފައިވަނީ އޭނާއަކީ ކައިވެނި ރޫޅިފައިވާ އަންހެނެއް ކަމަށާއި އެހެން ނަމަވެސް އެއީ އޭނާގެ ހަޔާތް ނިމުމަކަށް އައުން ނޫން ކަމަށެވެ. އެގޮތުން މިއަދު އޭނާއަކީ އުފާވެރި ދިރިއުޅުމެއް އުޅޭ މީހެއް ކަމަށް ސަމާންތާ ބުންޏެވެ.

2017 ވަނަ އަހަރު ސަމާންތާ ނަގަ ޗައިތަންޔާއާ ކައިވެނި ކުރިއިރު އޭގެ ހަތަރު އަހަރު ފަހުން 2021 ވަނަ އަހަރު އެ ކައިވެނި ވަނީ ރޫޅިފަ އެވެ.