އެމްއެމްއޭގެ ގަވަރުނަރު އަހްމަދު މުނައްވަރު އަލަށް ނިންމެވި ނިންމެވުމެއްގެ ދަށުން މަރުކަޒީ ބޭންކަށް އަލަށް އައްޔަންކުރި މެނޭޖިން ޑިރެކްޓަރުންގެ މައުލޫމާތު ހަސަން ކުރުސީގެ ނަމުގައި ހިންގާ އެކްސް އެކައުންޓަށް ދިން މީހަކު ހޯދަން ފުލުހުން އެމްއެމްއޭއަށް ވަދެއްޖެ އެވެ.

ފުލުހުންގެ ތަރުޖަމާނު އަދި އެސިސްޓެންޓް ޕޮލިސް ކޮމިޝަނަރު އަހްމަދު ޝިފާން ވިދާޅުވީ ފުލުހުން އެމްއެމްއޭއަށް ވަނީ އެތަނުގެ ބައެއް މުވައްޒަފުންގެ ޒާތީ މައުލޫމާތު ލީކްކޮށްލިގޮތް ހޯދަން އެ ބޭންކުގެ ފަރާތުން ހުށަހަޅާފައިވާ މައްސަލައިގެ ތަހުގީގަށް ކަމަށެވެ.

އެނގިފައިވާގޮތުގައި ފުލުހުން ބަލަމުން އަންނަ މައްސަލައަކީ ހަސަން ކުރުސީގެ އެކްސް އެކައުންޓުން އެމްއެމްއޭގެ މެނޭޖިން ޑިރެކްޓަރުގެ މަގާމަށް އައްޔަން ކުރި މަރިޔަމް ރަޝްފާ އާ ގުޅޭގޮތުން ހިއްސާކުރި މައުލޫމާތުތަކާ ގުޅޭ މައްސަލައެކެވެ.

ހަސަން ކުރުސީ ހިއްސާކޮށްފައިވާ މައުލޫމާތުތަކުގައި ބުނެފައި ވަނީ ރަޝްފާއަށް އެ މަގާމު ލިބުނީ ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދުއާ އޮތް ގުޅުމެއްގެ ތެރެއިން ކަމަށެވެ. އަދި ރަޝްފާ މީގެ ކުރިން އެމްއެމްއޭގައި ވަޒީފާ އަދާކުރިއިރު އެ ބޭންކުގެ ހިއުމަން ރިސޯސަސް ޑިޕާޓްމަންޓުން އޭނާއަށް ފޮނުވި އިންޒާރުގެ ސިޓީގެ ކޮޕީއެއް ވެސް ހަސަން ކުރުސީ ވަނީ އާންމުކޮށްފަ އެވެ.

ހަސަން ކުރުސީކޮށްފައިވާ ތުހުމަތުތަކާ ގުޅިގެން ރައީސްގެ އަނބިކަނބަލުން ސާޖިދާ މިހާތަނަށް ވަކިއެއްޗެއް ވިދާޅެއްނުވެ އެވެ.

އެނގިފައިވާގޮތުގައި ފުލުހުންގެ ތަހުގީގު ޓީމުން އިއްޔެ އާއި މިއަދު އެމްއެމްއޭއަށް ވަދެފައިވެ އެވެ. އެމްއެމްއޭ އިން ބުނީ އެ ބޭންކުގެ މުވައްޒަފެއްގެ ޒާތީ މައުލޫމާތުތައް ސޯޝަލް މީޑިއާގައި ލީކްވިގޮތް ހޯދަން އެތެރޭގެ ތަހުގީގެއް ކުރަމުން އަންނަ ކަމަށެވެ. އަދި އެކަމަށް ފުލުހުންގެ ފަންނީ އެހީތެރިކަން ހޯދަމުން އަންނަ ކަމަށް ވެސް އެމްއެމްއޭ އިން ބުންޏެވެ.

ހަސަން ކުރުސީ ފޮޓޯއާއެކު އާންކުކޮށް ތުހުމަތުކޮށްފައިވާގޮތުގައި ލ. ފޮނަދުއަށް ނިސްބަތްވާ ބޭފުޅަކު ވެސް މެނޭޖިން ޑިރެކްޓަރު ކަމަށް އައްޔަންކޮށްފައިވެ އެވެ. އަދި އޭނާ އެ މަގާމަށް އައްޔަން ކުރީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ އެންގެވުމަށް ކަމަށް ވެސް ތުހުމަތުކޮށްފައިވެ އެވެ. ނަމަވެސް މި ތުހުމަތާ ގުޅިގެން އަބްދުއްރަހީމް މިހާތަނަށް އެއްވެސް އެއްޗެއް ވިދާޅެއްނުވެ އެވެ.