ބައިނަލްއަޤްވާމީ ޖިނާއީ ކޯޓުން އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ އާއި ކުރީގެ ދިފާއީ ވަޒީރު ޔޯވް ގަލަންޓް، އަދި ހަމާސްގެ އަސްކަރީ ކޮމާންޑަރު މުޙައްމަދު ދެއިފް ހައްޔަރުކުރުމުގެ އަމުރު ނެރެފި އެވެ.

އިންޓަނެޝަނަލް ކްރިމިނަލް ކޯޓް (އައިސީސީ) އިން ނެރުނު އަމުރުގައި ބުނެފައިވަނީ އެ އަމުރު ނެރެފައިވަނީ އެމީހުން އިންސާނިއްޔަތާ ހިލާފަށް ކުރަމުންދާ ކަންކަމާއި ހަނގުރާމައިގެ ކުށްތައް ކުރިކަމުގެ ތުހުމަތުގައި ކަމަށެވެ.

ގަލަންޓް އާއި ނަތަންޔާހޫ "ގަސްތުގައި އަދި އެނގިހުރެ" ޣައްޒާގެ އާއްމު ރައްޔިތުންނަށް ދިރިހުރުމަށް ކޮންމެހެން ބޭނުންވާ ތަކެތި، އޭގެ ތެރޭގައި ކާނާ، ފެން، ބޭސް އާއި މެޑިކަލް ސާމާނު، އަދި ތެލާއި ކަރަންޓު ހިމެނޭގޮތަށް ހުރިހާ އެއްޗަކުން މަހުރޫމުކޮށްފައިވާކަމަށް ވެސް ބަޔާނުގައި ބުނެފައިވެ އެވެ.

މީގެ އިތުރުން، އެ ކޯޓުގެ އިހްތިޞާޞްއާ މެދު އިޒްރޭލުން ހުށަހެޅި ދެ މައްސަލައެއްވެސް ކޯޓުން ވަނީ ބާތިލުކޮށްފަ އެވެ. ނަމަވެސް އިޒްރޭލުގެ އިސްވެރިން ދަނީ އައިސީސީގެ މި އަމުރަށް ފާޑުކިޔަމުންނެވެ.

އިޒްރޭލަށް ހަތިޔާރު ފޮނުވުން ހުއްޓުވުމަށް ހުށަހެޅުނު ހުށަހެޅުމެއް ވެސް އެމެރިކާގެ ސެނެޓުން ވަނީ އިއްޔެ ބާތިލުކޮށްފަ އެވެ. މިކަން ކޮށްފައިވަނީ ޣައްޒާގައި ހިނގަމުންދާ ހަނގުރާމަ ވަގުތުން ހުއްޓާލުމަށް ގޮވާލާ އދ. ގެ ސަލާމަތީ މަޖިލީހުގެ ޤަރާރަކަށް އެމެރިކާއިން ވީޓޯ ކުރިތާ ކުޑައިރުކޮޅެއް ފަހުންނެވެ.

އިޒްރޭލުން ޣައްޒާގައި ހިންގަމުންދާ ނަސްލު ފޮހުމުގެ އަމަލުތަކުގައި 2023 އޮކްޓޯބަރ 7 އިން ފެށިގެން މަދުވެގެން 44،056 ފަލަސްތީނު ރައްޔިތުން ޝަހީދުކޮށްލައި، 104،286 މީހުން ޒަޚަމްކޮށްލާފައިވެ އެވެ. ލުބުނާނަށް އިޒްރޭލުން ދެމުންދާ ހަމަލާތަކުގައި މިހާތަނަށް 3،558 މީހުން ޝަހީދުވެ، 15،123 މީހުން ޒަޚަމްވެފައިވެ އެވެ.