ޕާޓީ ބަދަލުކުރުމުން މަޖިލީހުގެ މެންބަރުކަން ގެއްލޭ ގޮތަށް ސަރުކާރުން މިއަދު ގާނޫނުއަސާސީއަށް ގެނައި އިސްލާހާއި ގުޅިގެން ސުޕްރީމް ކޯޓަށް މައްސަލަ ހުށަހެޅުމަށް ކުރީގެ ދިއްގަރު ދާއިރާގެ މެންބަރުން އަދި އެމްއާރްއެމްގެ ރައީސް އަހުމަދު ފާރިސް މައުމޫން ގޮވާލައްވައިފި އެވެ.

ރައްޔިތުންގެ މަޖިލީހުގެ މެމްބަރަކު ނިސްބަތްވާ ޕާޓީއަކުން އެ މެމްބަރަކު ވަކިކޮށްފިނަމަ، ނުވަތަ ޕާޓީ ބަދަލުކޮށްފިނަމަ ގޮނޑިގެއްލޭނެ ކަމަށް ގާނޫނުުއަސާސީގައި ހިމަނަން ހުށަހެޅި އިސްލާހު މިއަދު ވަނީ ފާސްކޮށްފަ އެވެ.

ރައީސް މުހައްމަދު މުއިއްޒުގެ އެއްގެވުމަށް ކުއްލިގޮތަކަށް އަވަސް އަރުވާލައިގެން މިއަދު ފާސްކުރި އެ އިސްލާހުތައް ސަރުކާރުގެ ފަރާތުން ހުށަހެޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދެވެ. އެ ބިލް ދިރާސާކުރީ މުޅި މަޖިލީހުގެ ކޮމިޓީއަކުންނެވެ.

މިކަމާއި ގުޅިގެން ސޯޝަލް މީޑިއާގައި ފާރިސް ހިއްސާކުރެއްވި ޕޯސްޓެއްގައި ވިދާޅުވީ މިއަދު ގާނޫނުއަސާސީއަށް ގެންނަން ހުށަހަޅާފައިވާ ބަދަލަކީ މަޖްލިސް މެންބަރަކު އިންތިޚާބުވުމަށްފަހު، ދާއިރާގެ ރައްޔިތުންގެ ބާރު މުޅިން ނިގުޅައިގަންނަ ބަދަލެއް ކަމަށެވެ.

"މިބަދަލަކީ ގާނޫނުއަސާސީގެ 90 ވަނަ މާއްދާގެ (ހ) އާ ކަނޑައެޅިގެން ފުށުއަރާ ބަދަލެއް" ފާރިސް ވިދާޅުވެފައިވެ އެވެ.

މި ބަދަލުގެ ގާނޫނީ ސައްހަ ކަމާމެދު ގޮތެއް ނިންމުމަށް ދިވެހިރާއްޖޭގެ ސްޕްރީމް ކޯޓަށް މައްސަލައެއް ހުށަހެޅުމަށް، ބާ ކައުންސިލަށާއި ދިވެހިރާއްޖޭގައި ތިއްބެވި ފުންނާބު އުސް ގާނޫނީ ވަކީލުން އަރިހުން ފާރިސް އެދިވަޑައިގެންފައިވެ އެވެ.

ޤާނޫނުއަސާސީގެ 90 ވަނަ މާއްދާގެ (ހ) ގައި ބުނަނީ ރައްޔިތުންގެ މަޖިލީހުގެ ޖަލްސާއެއްގައި، ނުވަތަ މަޖިލީހުގެ ކޮމިޓީއެއްގައި މަޖިލީހުގެ މެންބަރަކު ނުވަތަ އެނޫންވެސް މީހަކު އިސްލާމްދީނުގެ އަޞްލަކާ ޚިލާފުނުވާނެ ގޮތުގެމަތިން ދެއްކި ވާހަކައެއް ނުވަތަ ހުށަހެޅި ހުށަހެޅުއްމުގެ ސަބަބުން ނުވަތަ ވޯޓު ދިނުމުގައި ޢަމަލުކުރި ގޮތެއްގެ ސަބަބުން، ކޯޓަކަށް އެމީހަކު ހާޒިރުކޮށް ނުވަތަ އެމީހަކާމެދު އެއްވެސް ތަޙްޤީޤެއް ހިންގައި ނުވަތަ ހައްޔަރުކޮށް ނުވަތަ ބަންދެއްކޮށް ނުވަތަ އެމީހަކާމެދު ދަޢުވާއެއްކޮށް ހަދައިގެނެއް ނުވާނެކަމަށެވެ.