29 އަަހަރު އެކުގައި އުޅުމަށްފަހު ބޮލީވުޑްގެ މަޝްހޫރު މިއުޒިކް ޑިރެކްޓަރު އޭއާރް ރަހްމާންއާއި އޭނާގެ އަންހެނުން ސައިރާ ބާނޫގެ ކައިވެނި ރޫޅުނުކަން އިއުލާން ކޮށްފި އެވެ.

މިދިޔަ އަންގާރަ ދުވަހު ސައިރާގެ ވަކީލުން އާއްމުކުރި ބަޔާނެއްގައި ބުނެފައިވަނީ އެއީ ސައިރާއަށް ވަރަށް އުނދަގޫ ނިންމުމެއް ކަމަށާއި އެހެން ނަމަވެސް އެ ނިންމުން ނިންމަން ޖެހުނީ ހައްލު ނުކުރެވޭ ފަދަ ބޮޑު މައްސަލަތަކެއްގެ ސަބަބުން ކަމަށެވެ.

އޭއާރް ރަހްމާންއާއި ސައިރާއަކީ ބޮލީވުޑްގައި އެންމެ ގިނަ ދުވަސް ވަންދެން ކައިވެނި ކޮށްގެން އުޅުނު އެއް ޖޯޑެވެ. އެ ދެމީހުން ވަނީ ވަރަށް ގިނައިން އެވޯޑު ޝޯތަކާއި އެނޫންވެސް ބޮލީވުޑްގެ ހަފްލާތަކުގައި އެކީގައި ފެނިފަ އެވެ.

މިކަމާ ބެހޭގޮތުން އޭއާރް ރަހްމާން އޭނާގެ ސޯޝަލް މީޑިއާ މެދުވެރިކޮށް ކުރި ޕޯސްޓެއްގައި ބުނެފައިވަނީ ވަރުގަދަ 30 ފުރިހަމަ ކުރެވޭނެ ކަމަށް އުއްމީދުކުރި ކަމަށާއި އެހެން ނަމަވެސް އެކަން އެގޮތަށް ނުވި ކަމަށެވެ.

އޭނާ ވަނީ މި ވަގުތު އެ އާއިލާއަށް ބޭނުންވާ މިނިވަންކަމާއި "ޕްރައިވަސީ" ދިނުމަށް މީޑިއާއާއި އާއްމުންގެ ކިބައިން އެދިފަ އެވެ.

1995 ވަނަ އަހަރު ކައިވެނިކުރި އޭއާރް ރަހްމާންއާއި ސައިރާ ބަައްދަލުވީ މައިންބަފައިން މެދުވެރި ވެގެންނެވެ. އެ ދެމީހުންގެ ކައިވެންޏަށް ތިން ދަރިން ލިބިފައިވެ އެވެ.