އިޒްރޭލު ޕާސްޕޯޓުގައި ރާއްޖެއަށް އެތެރެ ކުރުން މަނާކުރުމަށް ގޮވާލާ އިދިކޮޅު އެމްޑީޕީން ރަށްޔިތުންގެ މަޖިލީހަށް ހުށަހަޅާފައިވާ ގަރާރަށް މިއަދު ބަހުސް ކޮށްފި އެވެ.

މި ގަރާރު މަޖިލީހަށް ހުށަހެޅުއްވީ އިދިކޮޅު އެމްޑީޕީގެ ގަލޮޅު އުތުރު ދާއިރާގެ މުހައްމަދު އިބްރާހީމް އެވެ.އިޒްރޭލު ޕާސްޕޯޓްގައި ރާއްޖެއަށް އައުން މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް މިއަހަރުގެ މެއި މަހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ.

މިއަދު ބަހުސްގައި ސަރުކާރު ހިންގާ ޕާޓީ ޕީއެންސީގެ މެންބަރުން މުޅިންވެސް ދައްކަވަނީ ކުރީގެ ސަރުކާރުގެ ވާހަކައާއި ސިޔާސީ ވާހަކަތައްކަން ފާހަގަކޮށްލެވެ އެވެ.

އެގޮތުން ކުރީގެ ރައީސް މުހައްމަދު ނަޝީދުގެ ސަރުކާރުގައި އިޒްރޭލާއި ގާތްގުޅުމެއް ބޭއްވިކަމަށް ސަރުކާރު މެންބަރުން ތުހުމަތުކޮށްފައިވެ އެވެ. އަދި ނިމިދިޔަ ރައީސް އިބްރާހީމް މުހައްމަދު ސޯލިހުގެ ވެރިކަމުގައި އަދި މަޖިލީހުގައި އެމްޑީޕީގެ މެޖޯރިޓީ އޮވެ، އިޒްރޭލު ޕާސްޕޯޓް މަނާކުރަން މަސައްކަތް ނުކުރުން ފާހަގަކޮށްފައިވެ އެވެ.

ޕީއެންސީގެ ބައެއް މެންބަރުން ވަނީ ނޫންގޮތަކަށް އިޒްރޭލު ޕާސްޕޯޓް މަނާކުރުމާއި ދެކޮޅުކަންވެސް ހާމަކޮށްފަ އެވެ. އެގޮތުން އިޒްރޭލާއި މެދު އަރަބިން ނަޅާ ފިޔަވަޅެއް ރާއްޖެއިން އަޅަންޖެހޭތޯ ރައްޔިތުން މަޖިލީހުގެ ތިނަދޫ އުތުރު ދައިރާގެ ޕީއެންސީ މެމްބަރުން ސައުދުﷲ ހިލްމީ ވަނީ ސުވާލު އުފައްދަވާފަ އެވެ.

ވެލިދޫ ދާއިރާގެ މެންބަރު މުހައްމަދު އައްބާސް ވަނީ ހުރިހާ އިޒްރޭލު ރައްޔިތުންގެ ޕާސްޕޯޓް މަނާކުރަން ފެނިވަޑައިނުގަންނަވާކަމަށް ވިދާޅުވެފަ އެވެ.

ބާރަށު ދާއިރާގެ އިބްރާހިމް ޝުޖާއު ވަނީ ފަލަސްތީނުގެ ހައްގުގައި މިހާތަނަށް ވެރިއަކު އެންމެ ގަދަކޮށް ވަކާލާތު ކުރެއްވީ ރައީސް މުހައްމަދު މުއިއްޒުކަމަށް ވިދާޅުވެ އިތުރުފުޅު ހައްދަވާފަ އެވެ. ފާހަގަކޮށްލެވޭ ގޮތުގައި 30 އަހަރު ރާއްޖޭގެ ވެރިކަން ކުރެއްވި ކުރީގެ ރައީސް މައުމޫން އަބްދުލްގައްޔޫމަށްވުރެ ބޮޑަށް ފަލަސްތީނުގެ ހައްގުގައި ވަކާލާތުކުރެއްވި ވެރިއެއް އަދި މި ގައުމުން ފެނިފައިނުވެ އެވެ.

އެމްޑީޕީގެ ފަރާތުން މަޖިލީހުގައި ވާހަކަދެއްކެވި މެންބަރުން ވަނީ ބިލު ހުށަހެޅިތާ ފަސް މަހަށްވުރެ ގިނަ ދުވަސްވެ މަޖިލީހުން ގޮތެއް ނުނިންމާ ލަސްކުރަމުންދާތީ ކަންބޮޑުވުން ފާޅުކޮށްފައިވެ އެވެ.

މިކަން ކުރުމުގެ ނިޔަތެއް ނެތްއިރު ސަރުކާރުން އިޒްރޭލު ޕާސްޕޯޓް މަނާކުރާނެކަމަށް މުޅި ދުނިޔެއަށް އިއުލާންކުރީ ކީއްކުރަންތޯ ކެންދޫ ދާއިރާގެ މެންބަރު މައުރޫފް ޒާކިރު ވަނީ ސުވާލު އުފައްދަވާފަ އެވެ. ވައިކަރަދޫ ދާއިރާގެ ހުސައިން ޒިޔާދު ވިދާޅުވީ ސަރުކާރުން އުޅެނީ މަޖިލީހުގެ ރައީސްގެ ބޮލުގައި މި ބިލު ލަސްވުން އެޅުވުމަށް ކަމަށެވެ. ޕީއެންސީން ވެސް ލަސްވެގެން ބަޔާން ނެރޭއިރު، މިކަމަށް ގޮތެއް ނިންމުން ލަސްކުރަންވީ ސަބަބަކީ ކޮބައިތޯ އޭނާ ވަނީ ސުވާލު އުފައްދަވާފަ އެވެ.

އެހެންކަމުން މަޖިލީހުގެ ބަހުސްގެ ތެރެއިން ފެނިގެން ދިޔައީ ފަލަސްތީނު ރައްޔިތުންގެ ހައްގުގައި އިޒްރޭލު ޕާސްޕޯޓު މަނާކުރުމަށް ބޭނުންވެގެން އުޅުމަށްވުރެ، ދެ ފަރާތުންވެސް ސިޔާސީ ބަހުސްކޮށް ސިޔާސީ ޕޮއިންޓު އިތުރުކުރުމަށް މަސައްކަތް ކުރާތެނެވެ.

ރައީސް މުހައްމަދު މުއިއްޒު ވެސް ފަލަސްތީނުގެ މައްސަލަ ބޭނުންކުރައްވަނީ އެ މަނިކުފާނުގެ މަގުބޫލުކަމާއި ތާއީދު އިތުރުކުރެއްވުމަށް އެކަނިކަން މިވަނީ ފެނި ހާމަވެފަ އެވެ. މިކަން ކުރުމުގައި އެއްވެސް ކޮޅަކުން އިހުލާސްތެރިކަމެއް ނުފެނެ އެވެ.