ކެނެބިސް ވޭޕު އޮއިލް ކަމަށް ބުނެ ކަސްޓަމްސް އިން އަތުލައިގަތް ޝިޕްމެންޓަކީ މަސްތުވާތަކެތި ނޫން ކަމަށް ފުލުހުން މިއަދު ބުނެފި އެވެ.

ވެލާނާ އިންޓަނޭޝަނަލް އެއާޕޯޓުން އެ ޝިޕްމެންޓު އަތުލައިގަތީ މިދިޔަ އޮކްޓޯބަރު މަހުގެ 14 ވަނަ ދުވަހުގެ ރެ އެވެ. ހޯމް މިނިސްޓަރު އަލީ އިހްސާން ވިދާޅުވީ އެ ޝިޕްމަންޓްގައި ހުރީ ޑްރަގް ކަމަށެވެ.

ފުލުހުންގެ މީޑިއާ އޮފިޝަލް ވިދާޅުވީ އޮކްޓޯބަރު މަހުގެ 14 ވަނަ ދުވަހު އަތުލައިގަތް ޝިޕްމެންޓު ޓެސްޓު ކުރުމުން މަސްތުވާތަކެއްޗަށް ނެގަޓިވްވެފައިވާ ކަމަށެވެ.

"މި ޝިޕްމެންޓުގައި ހުރި ތަކެތި މަސްތުވާތެކެއްޗަށް ޓެސްޓު ކުރުމަށް ހެދި ފޮރެންސިކް ލެބު ޓެސްޓުން ދައްކާފައި ވަނީ ނެގެޓިވް ކަމަށް،" އޮފިޝަލް ވިދާޅުވި އެވެ.

މިނިސްޓަރު އިހްސާން ވިދާޅުވެފައި ވަނީ ފުލުހުން އެ މައްސަލަ ތަހުގީގު ކުރަމުން އަންނަ ކަމަށެވެ.