އެންމެ ދެ ވޯޓުގެ ތަފާތުން ޕީއެންސީގެ ރިޔާސީ ޕްރައިމަރީ ކާމިޔާބުކުރި ރައީސް މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރައްވާ ވެރިކަމާ ހަވާލުވެ ވަޑައިގެންނެވިތާ މިއަދަށް އަހަރެއް ވާއިރު، ރާއްޖޭގެ ގިނަ ރައްޔިތުންގެ މޫނުމަތިން ފެންނަނީ މާޔޫސްކަމެވެ.

އެންމެ ބޮޑު މާޔޫސްކަމެއް ލިބުނީ ރައީސް މުއިއްޒު ހޮވުމަށް ތާއީދުކޮށް ވޯޓް ދިން ފަރާތްތަކަށެވެ. ރައީސް މުއިއްޒަށް ވޯޓް ދިން މީހުންގެ ބޮޑު އިންސައްތަ އަކީ ޕީޕީއެމްގެ މެންބަރުންނެވެ. އޭގެ ތެރެއިން ގިނަ ބަޔަކު ޕީޕީއެމްގެ އޭރުގެ ރައީސް ޔާމީން ޖަލުން މިނިވަން ކުރުމަށް ވޯޓް ދިނެވެ.

ނަމަވެސް ވެރިކަން ލިބުމާއެކު، ރައީސް ޔާމީން ދުރުކޮށް އެންމެ ފަހުން ޕީޕީއެމް ވެސް ބާކީކޮށް މިހާރު ދަނީ 38،000 މެންބަރުން ހިމެނޭ ރާއްޖޭގެ ދެވަނައަށް އެންމެ ބޮޑު ޕާޓީ ޕީޕީއެމް އުވާލުމުގެ މަސައްކަތް ކުރަމުންނެވެ. އެތައް މެންބަރުންނެއް ވަނީ ބާކީކޮށް މަގުމަތިކޮށްފަ އެވެ.

ރާއްޖޭގައި ހާއްސަކޮށް މާލެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ އެންމެ ބޮޑު ގޮންޖެހުމަކީ ބޯހިޔާވަހިކަމުގެ ދަތިކަމެވެ. ކޮންމެ ވެރިކަމެއްގައި ވެސް އެންމެ ބޮޑު ވައުދަކީ ބޯހިޔާވަހިކަން ކަށަވަރު ކޮށްދިނުމެވެ. ރައީސް މުއިއްޒު ވެސް ސަތޭކަ ފަހަރު އެހެން ވިދާޅުވި އެވެ. ނަމަވެސް ވެރިކަމަށް އެއް އަހަރު ވީއިރު، މި ސަރުކާރަށް ބޯހިޔާވަހިކަމުގެ މަޝްރޫއެއްގެ އަމަލީ މަސައްކަތް ނުފެށުނު އިރު، ކުރީގެ ސަރުކާރުން ދޫކުރި ފްލެޓުތައް ވެސް ސަރުކާރުން ހިފަހައްޓައި އެތައް ރައްޔިތުންނެއްގެ ހައްގަށް ވަނީ އަރައިގެންފަ އެވެ.

ހައުސިން މިނިސްޓްރީން އެކިފަހަރު މަތިން ފްލެޓް ލިސްޓު އިއުލާން ކުރާނެ ތާރީހު ކަނޑައެޅުމަށްފަހު، އެންމެ ފަހުން ވަނީ ތާރީހެއް ނެތް ގޮތަށް ލިސްޓު އިއުލާންކުރުން ލަސްކޮށްފަ އެވެ.

ރިޔާސީ އިންތިހާބުގެ ކެމްޕޭން ތެރޭގައި ރައީސް މުއިއްޒު ވަރަށް އަޑުހަރުކޮށް ވަނީ ވާނުވާ ބަންދު ނިމުމަކަށް ގެންނަވާނެ ކަމަށް ވިދާޅުވެފަ އެވެ. އެގޮތުން ރައީސްގެ ވެރިކަމެއްގައި މީހަކާމެދު ގޮތެއް ނުނިންމައި ބަންދުގައި ބެހެއްޓޭނީ ގިނަވެގެން 48 ގަޑިއިރުކަމަށް ވިދާޅުވި އެވެ. މިއީ އެހާ ބޮޑުކަމެއް ކުރަންޖެހޭ މަސައްކަތެއް ނޫން ކަމަށާއި ގާނޫނަށް ގެންނަންޖެހޭ އިސްލާހު ގެނެސް އެކަން ކުރައްވާނެ ކަމަށް ރައީސް މުއިއްޒު ވަނީ ވިދާޅުވެފަ އެވެ. ނަމަވެސް ޕީއެންސީއަށް މަޖިލީހުގެ ސުޕާ މެޖޯރިޓީ ލިބި އެތައް ދުވަހެއް ހޭދަވެފައިވާއިރު، ވާނުވާ އުވާލުން އޮތީ ވާނުވާއެއްގެ ތެރޭގައި އެވެ.

ރާއްޖޭގެ މާލީ ހާލަތު ދަށްވެ، ހަރަދު ކުޑަކުރުމަށް ފިޔަވަޅުތަކެއް އަޅަން ޖެހިފައިވާއިރު، މިހާރު ވެސް މި ސަރުކާރުން ދަނީ އެތައް ސިޔާސީ މަގާމަކަށް ބޮޑެތި ހަރަދުތަކެއް ކުރަމުންނެވެ. ރައީސް ކުރިން ވިދާޅުވެފައި ވަނީ ސިޔާސީ މަގާމުތައް 700 އަށް ވުރެ ގިނަ ނުކުރައްވާނެ ކަމަށެވެ. ނަމަވެސް ސިޔާސީ މަގާމުތަކުގެ އަދަދު ސަރުކާރުން ސިއްރުކޮށްފައިވާއިރު، އެ އަދަދު އުޅެނީ 2،000 އަށް ވުރެ މަތީގައި ކަމަށްވެ އެވެ. ހަރަދުކުޑަކުރަން އަޅާ ފިޔަވަޅެއްގެ ގޮތުން ސިޔާސީ މަގާމު މަދުކުރައްވާނެ ކަމަށް ވިދާޅުވި ނަމަވެސް މިހާތަނަށް މަދުކުރެއްވިކަން އެނގިފައެއް ނުވެ އެވެ.

ސިޔާސީ މަގާމުތަކަށް ދައުލަތުގެ ބަޖެޓުން ބޮޑު ހޭދައެއް ކުރަމުންދާއިރު، ހަރަދުކުޑަކުރުމުގެ ގޮތުން އާދައިގެ ރައްޔިތުންގެ އާސަންދަ އާއި އުމުރުން ދުވަސްވީ މީހުންގެ އެލަވަންސް ފަދަ ކަންކަމަށް ބަދަލު ގެނައުމުގެ މަސައްކަތް ސަރުކާރުން ވަނީ ފަށައިފަ އެވެ. ކުންފުނިތަކުގެ މުވައްޒަފުންގެ މުސާރަ ކުޑަކުރުމަށް ވެސް ސަރުކާރުން ދަނީ ވިސްނަމުންނެވެ.

ދިރިއުޅުމުގެ ހޭދަ އިންތިހާއަށް ބޮޑުވެ، ރައްޔިތުންނަށް ހަރަދުތައް ފޫބެއްދުމުގައި އެތައް ގޮންޖެހުންތަކަކާއި ކުރިމަތިވެފައިވާއިރު، ސަރުކާރުގެ ވިސްނުމުގައި ރައްޔިތުންނަށް ފަސޭހަ ދިރިއުޅުމެއް ހޯދައިދިނުމަށް ނެތްކަން ދަނީ ހާމަވަމުންނެވެ.

މި ހުރިހާ ސަބަބުތަކާއި ހެދި ރާއްޖޭގެ ވަރަށް ގިނަ ރައްޔިތުން ތިބީ ރައީސް މުއިއްޒުއާއި ޕީއެންސީގެ ވެރިކަމާއި މެދު މާޔޫސްވެފަ އެވެ. ގިނަ ރައްޔިތުން މިހާރު ބުނަމުންދަނީ މިވެރިކަން ގެންނަން ވޯޓް ދެވުމުން މޮޔަހީވާ ކަމަށެވެ. އުންމީދުކުރި ގޮތާ ދިމާ އިދިކޮޅަށް ވެރިކަން ކުރައްވަމުން ދާކަމަށް ގިނަ ބަޔަކު ބުނެ އެވެ. ގައުމަށް ދިމާވެފައިވާ އިގްތިސޯދީ ހާލަތުން އަރައިގަތުގެ ގާބިލުކަން މި ސަރުކާރުގައި ނެތް ކަމަށް ގިނަ ބަޔަކު ދެކެ އެވެ. މުޅިން ވެސް ފެންނަނީ ނާގާބިލުކަމާއި އޮޅުވާލުމާއި ދޮގުވެރިކަން ކަމަށް ގިނަ ބަޔަކު ގަބޫލުކުރެ އެވެ.