ސްޓާ ޕްލަސްއިން ދުރަށް ދެއްކި ކާމިޔާބު ސީރީޒް "ޔޭ ހޭ މޮހައްބަތޭން"ގެ ލީޑު ތަރިންގެ ގޮތުގައި ފެނުނު ކަރަން ޕަޓޭލްއާއި ދިވްޔަންކާ ޓްރިޕާތީއަކީ ބެލުންތެރިންގެ މަގުބޫލުކަން ހޯދި ޖޯޑެކެވެ.

އެ ޝޯއަށް ލިބުނު ބޮޑު ކާމިޔާބީގައި އެ ދެތަރިން އެކުގައި ކުޅުނު ރޯލު ވަރަށް ބޮޑު ކަމަށް ޝޯގެ ޕްރޮޑިއުސަރު އެކްތާ ކަޕޫރު ވެސް ބުނެފައިވެ އެވެ.

އެހެން ކަމުން 11 އަހަރަށްފަހު އަނެއްކާވެސް އެ ދެތަރިން އެކުގައި ސްކްރީނަށް ގެންނަން އެކްތާ މަސައްކަތް ކުރަމުން އަންނަ ކަމަށް ހަބަރުތައް ބުނެ އެވެ.

ކަރަންއާއި ދިވްޔަންކާ އެކުގައި ފެންނަ ޝޯގެ މާ ބޮޑު ތަފްސީލެއް މީޑިއާއަށް އެނގިފައި ނުވި ނަމަވެސް އެ ޝޯގެ ސްކްރިޕްޓާއި ސްކްރީންޕްލޭގެ މަސައްކަތް މިހާރު ކުރިއަށްދާ ކަމަށްވެ އެވެ.

2013 ވަނަ އަހަރު ދައްކަން ފެށި "ޔޭ ހޭ މޮހައްބަތޭން" ފަސް އަހަރަށް ދެމިގެންދިޔައިރު އެ ދެމީހުންނަށް "އެންމެ މޮޅު ޖޯޑު"ގެ އެވޯޑުވެސް އެތައް ފަހަރަކު ލިބުނެވެ.

ކުޑަ ކުއްޖަކަށް އޮތް ލޯބީގެ ސަބަބުން ގުޅުވައިދޭ ދެމީހުންގެ ވާހަކަ ދައްކުވައިދޭ "ޔޭ ހޭ މޮހައްބަތޭން"އަކީ ދިވެހިންގެ މެދުގައި ވެސް ވަރަށް މަގުބޫލުވި ސީރީޒް އެކެވެ.