އައިކޮމްގެ އަޑުއެހުމަކަށް ހާޒިރުނުވުމުން ހައުސިން ޖޫރިމަނާކޮށްފި
އެންޖެލީނާ ފަންޑިތަ ހަދާ ކަމަށް ބުނެފި
ރައްޔިތުންގެ ހިޔާލު ހުށަހެޅުމަށް ވަގުތު ދޭންޖެހޭ: ބާކައުންސިލް
މާލޭގެ ހެންވޭރު ސަރަހައްދުގައި ދިރިއުޅޭ މީހުންގެ ތެރެއިން ވެލާނާ އިންޓަނޭޝަނަލް އެއާޕޯޓުގެ އެކި ވަޒީފާތަކަށް ދާ މީހުންނަށް އެމްޓީސީސީގެ ބަހުގައި ދަތުރުނުކުރެވޭތީ ބޮޑެތި ތަކުލީފުތަކާ ކުރިމަތިލާން ޖެހިއްޖެ އެވެ.
އެމްޓީސީސީން މާލެ ސަރަހައްދުގައި ދޭ ބަސް ހިދުމަތުގައި ކާނިވާ ސަރަހައްދުން އެއާޕޯޓަށް ކުރިން ކުރަމުން އައި ދަތުރުތައް ވަނީ ހުއްޓާލާފަ އެވެ. މިކަމާ ގުޅިގެން ހެންވޭރު ސަރަހައްދުގައި ދިރިއުޅޭ އެތައް ބަޔަކަށް ވަޒީފާއަށް ދިއުމަށް މިހާރު އޮތް ހަމައެކަނި ގޮތަކީ އެއާޕޯޓާއި މާލެއާ ދެމެދު ދަތުރުކުރާ މުސްކުޅި ލަކުޑި ފެރީތަކުގައި ދަތުރުކުރުމެވެ.
އެއާޕޯޓުގައި ވަޒީފާ އަދާކުރާ މީހަކު "ހުރިހާ" އާ ވާހަކަދައްކަމުން ބުނީ ހެންވޭރުގައި ދިރިއުޅޭ މީހުން އެއާޕޯޓަށް ވަޒީފާއަށް ދާނަމަ، ޖެހެނީ ހުޅުލެ -މާލެ ފެރީގައި ދަތުރުކުރަން ކަމަށާއި، އެކަމުގެ ސަބަބުން ވަރަށް ގިނަ ވަގުތު ގެއްލި އެތައް އުނދަގުލެއް ކުރިމަތިވާ ކަމަށެވެ.
"ފަހަކަށް އައިސް ފެރީ ދުއްވާ ގިނަ ކެޕްޓަނުން ތިބެނީ ބޮއެގެން ނިދިޖެހިފައި. ވިއްސާރަ ވިއްޔާ ފެން ވިއްސާ، ހޫނު ދުވަހެއް ވިއްޔާ ދާހިއްލާ ފޯވެ އެއާޕޯޓަށް ދެވޭއިރު މީހާގެ ފްރެޝްކަން ހުންނަނީ ގެއްލިފައި،" އެ މީހާ ބުންޏެވެ.
އެ މުވައްޒަފު ބުނީ އެއާޕޯޓުގައި މަސައްކަތްކުރާ އެ މުވައްޒަފު ބުނީ ރޭގަނޑު 9:00 ގެ ފަހުން ފެރީ ދަތުރުތައް އޮންނަނީ ކޮންމެ ބައިގަޑިއިރަކުން ކަމަށްވުމުން ވަގުތުތަކެއް ގެއްލޭ ކަމަށެވެ.
"ބައެއް ފަހަރު ރޭގަނޑު ވެސް ޑިއުޓީ އެބަ ނިމޭ. ޑިއުޓީ ނިމިގެން ފެރީ އަންނަން ދެން އެބަޖެހޭ ބައިގަޑިއިރު މަޑުކުރަން،" އޭނާ ބުންޏެވެ.
އެއާޕޯޓުގައި މަސައްކަތްކުރާ ރިސޯޓެއްގެ ރެޕަކު ބުނިގޮތުގައި މާލޭގެ އެހެން ސަރަހައްދުތަކުން އެއާޕޯޓަށް ވަޒީފާއަށްދާ މީހުންނަށް ދަތުރުކުރެވޭ ކަމަށާއި، އަދި އެކި ކުންފުނިތަކުން ވެސް މުވައްޒަފުންގެ ދަތުރުތަކަށް ހާއްސަކޮށް ވެހިކަލް ހަމަޖައްސާފައި ހުންނަ ކަމަށެވެ. ނަމަވެސް އެއާޕޯޓްގައި މަސައްކަތްކުރާ މުވައްޒަފުން ވަޒީފާއަށް ދެވޭނެ ފަސޭހަގޮތެއް ހަމަޖެހިފައިނުވާ ކަމަށް އޭނާ ބުންޏެވެ.
"މިސާލަކަށް ޓީއެމްއޭ އިން ވެސް ކާނިވާ ކައިރިއަށް އެ މީހުންގެ ބަހެއް ފޮނުވާ މުވައްޒަފުން ނަގަން. އަދި އެ ނޫން ބައެއް ކުންފުނިތަކުން ވެސް ބަސް އެބަ ފޮނުވާ. އެކަމަކު އެމްޓީސީސީގެ ބަހެއް ކާނިވާ ކައިރިން އެއާޕޯޓަށް ބޭއްވޭ ކަމަކަށް ނުވޭ،" އެ މުވައްޒަފު ބުންޏެވެ.
އެއާޕޯޓުގައި މަސައްކަތްކުރާ ބައެއް މުވައްޒަފުން ޓެކްސީގައި އެއާޕޯޓަށް ދިއުމަށް މަހަކު 2،500 އާއި 4،000ރ. އާ ދެމެދުގެ އަދަދެއް ހަރަދުކުރަން ޖެހެ އެވެ.
އެއާޕޯޓުގައި މަސައްކަތްކުރާ އެހެން މުވައްޒަފަކު "ހުރިހާ" އާ ވާހަކަދައްކަމުން ބުނީ ކުރިން ހެންވޭރު ކާނިވާ ސަރަހައްދުން އެއާޕޯޓަށް އެމްޓީސީސީން ކުރަމުން ދިޔަ ބަސް ދަތުރުތައް ހުއްޓާލީ ފެރީ ދުއްވާ މީހުންގެ ނުފޫޒުން ކަމަށެވެ. އަދި އަމިއްލަ ސައިކަލްގައި އެއާޕޯޓަށް ދިޔަސް ސައިކަލް ޕާކް ކުރާނެ ތަނެއް މިހާރު ހޯދުމަކީ ވަރަށް ބޮޑު އުނދަގުލެއް ކަމަށް ވެސް އެ މީހާ ބުންޏެވެ.
"އެއާޕޯޓުގައި އެކިއެކި ވަޒީފާ އަދާކުރާ މުވައްޒަފުންގެ އަދަދު ދުވަހެއް ދުވަހަކަށް އަންނަނީ އިތުރުވަމުން. ނަމަވެސް އެއާޕޯޓުގައި ޕާކުކުރާނެ ޖާގައެއް އިތުރެއް ނުވޭ،" އެ މުވައްޒަފު ބުންޏެވެ.
އެމްޓީސީސީ ބަސް މިހާރު މާލެ އިން އެއާޕޯޓަށް ދަތުރުކުރާ ރޫޓަކީ މާފަންނު ވެސްޓްޕާކުން ފެށިގެން މާފަންނު ބަސްޓާމިލުން ހެންވޭރު ސަރަހައްދުގައި ބޮޑުތަކުރުފާނު މަގުގައި ހުންނަ ސްޓެލްކޯ ކައިރިން އެއާޕޯޓަށެވެ.
