އިންޓަނެޓް ބޭނުން ކުރުމުގައި ރައްކާތެރިކަން ކަށަވަރުކުރުމުގެ ގޮތުން ދިރާގުން "ނެޓް ޕްރޮޓެކްޓް" ތައާރަފްކޮށްފި އެވެ.

މި ހިދުމަތް ތައާރަފް ކުރުމަށް ދިރާގު ހެޑް އޮފީހުގައި މިއަދު ނޫސްވެރިންނަށް މައުލޫމާތު ދެއްވަމުން އެ ކުންފުނީގެ ކަސްޓަމާ ވެލިއު މެނޭޖަރު، ބްރޯޑްބޭންޑް އެންޑް ޑިވައިސަސް އަހުމަދު އިޝާން ވިދާޅުވީ މިއީ ސައިބާ ސެކިއުރިޓީއަށް އެޅޭނެ ރަނގަޅު ފިޔަވަޅެއް ކަމަށެވެ.

އިޝާން ވިދާޅުވީ މި ހިދުމަތަކީ އިތުރު ސޮފްޓްވެއާއެއް ބޭނުން ނުކޮށް އަދި އިތުރު އެޕްލިކޭޝަނެއް އިންސްޓޯލް ނުކޮށް ކަސްޓަމަރުންނަށް ރައްކާތެރިކަމާ އެކު އިންޓަނެޓް ބޭނުން ކުރެވޭނެ ހިދުމަތެއް ކަމަށެވެ.

'މިއީ ބޭނުން ގޮތަކަށް ކަސްޓަމައިޒް ކުރެވޭނެ ހިދުމަތެއް،" އޭނާ ވިދާޅުވި އެވެ.

އޭނާ ވިދާޅުވިގޮތުގައި ދިރާގު ނެޓް ޕްރޮޓެކް ކަސްޓަމައިޒް ކުރެވޭނީ ޕްރޮޓެކްޓް ޕޯޓަލްއިންނެވެ. މޮބައިލް އިންޓަނެޓް އަދި ފިކްސްޑް ބްރޯޑްބޭންޑް ހިދުމަތަށް އެކަނި ފަށާފައިވާ މި ހިދުމަތް އެކްޓިވޭޓްކޮށް ބޭނުން ކުރުމަށް މޮބައިލް ކަސްޓަމަރުން މަހަކު 35ރ. ދައްކަން ޖެހެ އެވެ. އަދި ފިކްސްޑް ބްރޯޑްބޭންޑް ކަސްޓަމަރުން މަހަކު 50ރ. ދައްކަން ޖެހޭ ކަމަށް އެ ކުންފުނިން ބުންޏެވެ.

އެކައުންޓް މައުލޫމާތާއި އަމިއްލަ މައުލޫމާތުތައް ލީކުވުމާއި މުޖުތަމައުއާ ނުގުޅޭ އެކި މަންޒަރުތައް ހިމެނޭ ވެބްސައިޓުތައް މި ހިދުމަތުގެ އެހީގައި ބްލޮކް ކުރެވޭނެ އެވެ.