އަންނަ ހަފްތާގެ އަންގާރަ ދުވަހު ބާއްވަން ހަމަޖެހިފައިވާ އެމެރިކާގެ ރިޔާސީ އިންތިހާބުގައި ޑމޮކްރެޓިކް ޕާޓީގެ ފަރާތުން ވާދަކުރާ ކެނޑިޑޭޓް ކަމަލާ ހެރިސްގެ ކެމްޕެއިން ހަރަކާތެއްގައި މަޝްހޫރު ލަވަކިޔުންތެރިޔާ ބިޔޯންސޭ ބައިވެރިވެއްޖެ އެވެ.

ސިޔާސީ ކަންކަމުގައި އާއްމުކޮށް ނުފެންނަ ބިޔޯންސޭ ވަނީ ކަމަލާގެ ކެމްޕެއިންގައި އާއްމުންނާ މުހާތަބުކޮށް ވާހަކަ ދައްކާފަ އެވެ. އެ ވާހަކައިގައި އޭނާގެ ތާއީދު ކަމަލާއަށް އޮތްކަން ބިޔޯންސޭ ހާމަކުރި އެވެ.

"އަހަރުމެން އެބަޖެހޭ މިފަހަރު މުޅިން އާ ލަވައެއް ކިޔަން" ޕޯޑިއަމްގައި ހުރެ ވާހަކަ ދައްކަމުން ބިޔޯންސޭ ބުނެފައިވެ އެވެ.

ބިޔޯންސޭ އިތުރަށް ބުނީ އޭނާ އެތަނުގައި ހުރީ މަޝްހޫރު ޝަހްސިއްޔަތެއްގެ ހައިސިއްޔަތުން ނޫން ކަމަށާއި ގައުމުގެ މުސްތަގްބަލަށް ހެޔޮއެދޭ މައެއްގެ ހައިސިއްޔަތުން ކަމަށެވެ.

އެ ހަރަކާތުގެ ތެރެއިން ބިޔޯންސޭގެ ހުށައެޅުމެއް ފެނިގެން ނުދިޔަ ނަމަވެސް އޭނާ ވަނީ ކަމަލާގެ ކެމްޕެއިންގައި އޭނާގެ ލަވައެއް ބޭނުން ކުރުމުގެ ހުއްދަ ދީފަ އެވެ.

ނޮވެމްބަރު މަހުގެ ފަސްވަނަ ދުވަހު ބާއްވާ އިންތިހާބުގައި މިހާރުގެ ނައިބު ރައީސް ކަމަލާއާ ވާދަކުރާނީ ރިޕަބްލިކަން ޕާޓީގެ ކެނޑިޑޭޓް ޑޮނަލްޑް ޓްރަމްޕް އެވެ.