ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ލިސްޓް އިއުލާނުކުރުން އަނެއްކާވެސް ފަސްކޮށްފި އެވެ.

ހައުސިން މިނިސްޓްރީން މިއަދު ނެރުނު ނޫސްބަޔާނެއްގައި ބުނެފައިވަނީ ރައީސުލްޖުމްހޫރިއްޔާގެ ލަފާފުޅުގެ މަތިން އެކުލަވާލި "ހައުސިން އެޑްވައިޒަރީ ކޮމިޓީ" އާއި މާލޭ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ" އިންވެސް ގެދޮރުވެރިޔާ ސްކީމުގެ ދާއިމީ ލިސްޓް އެކުލަވާލާފައިވާ ގޮތް ރަނގަޅުކަމަށް ނުފެންނާތީ ލިސްޓް އާއްމުކުރުން ފަސްކުރީ ކަމަށެވެ.

މާލެ ސަރަހައްދުން ފްލެޓް ދޫކުރުމަށް 26 ޖޫން 2022 ގައި ފަށާފައިވާ "ގެދޮރުވެރިޔާ" ސްކީމްގެ ދަށުން 15 ނޮވެމްބަރ 2023 ގައި އިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓް އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލައާއި ގުޅިގެން އަލުން ލިސްޓުތައް މުރާޖާއާކުރުމަށް ހައުސިން މިނިސްޓްރީން ފެށި އެވެ.

އެގޮތުން މިނިސްޓްރީން ބުނީ މި ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ- އިވެލުއޭޓްކުރުމުގެ މަސައްކަތް މިނިސްޓްރީން ވަނީ ފަށާފައިވާ ކަމަށާއި މި މަސައްކަތްތައް ފުރިހަމައަށް ނިންމާލުމަށް އިތުރު ވަގުތު ބޭނުންވާތީ، މި އަހަރުގެ ނޮވެމްބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓް އާންމު ކުރުމުގެ މަސައްކަތްތައް މިނިސްޓްރީއިން ކުރަމުންދާނެ ކަމަށެވެ.

އެ މިނިސްޓްރީން އެކި ފަހަރު މަތިން ފްލެޓް ލިސްޓު އާންމުކުރުން ފަސްކޮށްފައިވާއިރު، މި ހަފްތާ ތެރޭގައި ފްލެޓް ލިސްޓް އާއްމުކުރުމަށް މައްސަކަތް ކުރަމުންދާކަމަށް ހައުސިން މިނިސްޓަރު އަލީ ހައިދަރު ވަނީ މީގެ ދެ ދުވަސް ކުރިން ވިދާޅުވެފަ އެވެ. މިދިޔަ ޖުލައި މަހުން ފެށިގެން ފްލެޓް ލިސްޓް އާއްމުކުރަނީ އޮކްޓޯބަރު މަހުގައި ކަމަށް ބުނަމުން ގޮސް، އޮކްޓޯބަރު މަސް ނިމެން ކައިރިވުމުން މިވަނީ އަނެއްކާވެސް ނޮވެމްބަރަށް ބަދަލުކޮށްފަ އެވެ.

ގެދޮރުވެރިޔާ ސްކީމަކީ ނިމިދިޔަ އިބްރާހިމް މުހައްމަދު ސޯލިހުގެ ސަރުކާރުން، މާލޭގައި ކުރިމަތިވެފައިވާ ބޯހިޔާވަހިމަކުގެ މައްސަލައަށް ހައްލު ހޯދައިދިނުމަށް ހިންގި މަޝްރޫއެކެވެ. މި ސަރުކާރު ހަވާލުވި އިރުވެސް ދޫކުރަން ތައްޔާރުވެފައިވާ ފްލެޓްތައް ސަރުކާރަށް އަހަރުވާއިރުވެސް ވަނީ ދޫނުކުރެވި ދިގުލައިގެން ގޮސްފަ އެވެ.