ރާއްޖޭގައި ތެލުގެ ވިޔަފާރި ފުޅާ ދާއިރާއެއްގައި ކުރާ، ހޯކްސްގެ ބޯޓެއްގައި ވަގަށް އެތެރެކުރަން އުޅުނު ގިނަ އަދަދެއްގެ ސިނގިރޭޓް ކާޓަންތަކެއް ކަސްޓަމްސްއިން ހިފަހައްޓައިފި އެވެ.

ކަސްޓަމްސްގެ އޮފިޝަލަކު ވިދާޅުވީ ހޯކްސްގެ ބޯޓަކުން އެތެރެކުރަން އުޅުނު ސިނގިރޭޓު ކާޓަންތަކެއް ހިފަހައްޓާފައި ވަނީ މިދިޔަ ހުކުރު ދުވަހުގެ ރޭ ކަމަށެވެ. ހިފަހައްޓާފައި ވަނީ ޖުމްލަ 1.695 މިލިއަން ސިނގިރޭޓް ސްޓިކްސް ކަމަށް ވެސް ކަސްޓަމްސް އިން ބުންޏެވެ.

ކަސްޓަމްސް އިން ބުނިގޮތުގައި އެތަކެތި ފެނުމާ ގުޅިގެން ކަސްޓަމްސްއިން ކުރިއަށްގެންދާ އޮޕަރޭޝަން އަދިވެސް ކުރިއަށް އެބަދެ އެވެ.

ހޯކްސްގެ އޮފިޝަލަކު ވިދާޅުވީ އެއީ ބޭރު ބަޔަކާއި އެ ކުންފުނީގެ މުވައްޒަފުންތަކެއް ގުޅިގެން ހިންގަފައިވާ ގާނޫނާ ހިލާފު ޖަރީމާއެއް ކަމަށެވެ. އެ ކުންފުނިން ވަނީ އެކަން އެންމެ ހަރުކަށި އިބާރާތުން ކުށްވެރިކޮށްފަ އެވެ.

ހޯކްސް އިން ބުނީ އެކަމާ ގުޅިގެން ތަހުގީގީ އިދާރާތަކަށް ދޭންޖެހޭ ފުރިހަމަ އެއްބާރުލުން އެ ކުންފުނިން ދޭނެ ކަމަށެވެ.

ސިނގިރޭޓުން ނަގާ އިމްޕޯޓް ޑިއުޓީ ތިން ރުފިޔާ އިން އަށް ރުފިޔާއަށް މަތިކުރަން ގާނޫނަށް އިސްލާހު ހުށަހަޅަން ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.

މީގެ އިތުރުން ދުންފަތާއި ދުންފަތުން އުފައްދާފައިވާ ތަކެތީގެ ވިޔަފާރީގެ މުއާމަލާތްކުރެވޭނެ އެންމެ ހަގު އުމުރަކީ 18 އަހަރުގެ ބަދަލުގައި 21 އަހަރުކަމަށް ކަނޑައެޅުމަށް ގާނޫނަށް އިސްލާހު ހުށަހަޅަން ވެސް ވަނީ ނިންމަވާފަ އެވެ.