ސަރުކާރުން އެމްޓީސީސީއާ ހަވާލުކޮށްފައިވާ 46 މަޝްރޫއެއްގެ މަސައްކަތް ހުއްޓިފައިވާ ކަމަށް އެ ކުންފުނިން ބުނެފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހުށަހެޅި އާރްޓީއައި އަށް އެ ކުންފުނިން ދިން ޖަވާބުގައި ވަނީ އެއާޕޯޓް ހެދުމާއި މަގު ހެދުމާއި ބަނދަރު ހެދުމާއި ކޯޒްވޭ ހެދުމާއި ބިން ހިއްކުމާއި ގޮނޑުދޮށް ހިމާޔަތްކުރުން ހިމެނޭހެން ޖުމްލަ 156 މަޝްރޫއު އެ ކުންފުންޏާ ހަވާލުކޮށްފައިވާ ކަމަށެވެ.

އޭގެތެރެއިން 65 މަޝްރޫއެއްގެ އަމަލީ މަސައްކަތް މިހާރު ހިނގަމުން އަންނައިރު، 46 މަޝްރޫއެއްގެ މަސައްކަތް އެކި ސަބަބުތަކާ ހެދި މަޑުޖައްސާލާފައިވާ ކަމަށެވެ. އަދި ބާކީ 46 މަޝްރޫއުގެ އަމަލީ މަސައްކަތް ފެށުމަށް ތައްޔާރުވަމުން އަންނަ ކަމަށް އެ ކުންފުނިން ބުންޏެވެ.

އެމްޓީސީސީން ބުނީ މަޝްރޫއުތައް ހުއްޓުނު ސަބަބު ހާމަކުރުމުގެ ގާނޫނީ ބާރު އެ ކުންފުންޏަށް ލިބިގެންނުވާތީ، އެ މައުލޫމާތު ހާމަކުރެވެން ނެތް ކަމަށެވެ.

ރައީސް ޑރ. މުހައްމަދު މުއިއްޒު ރިޔާސީ އިންތިހާބުގެ ކެމްޕޭންގެ ތެރޭގައި ވިދާޅުވެފައި ވަނީ އެއްވެސް ރަށެއްގައި ހިންގާ މަޝްރޫއެއް ހުއްޓާނުލައްވާނެ ކަމަށެވެ. ނަމަވެސް މަޝްރޫއުތައް ހުއްޓިފައިވާއިރު، އެކަމުގެ އެއްވެސް މައުލޫމާތެއް ސަރުކާރުން ހިއްސާކޮށްފައެއް ނުވެ އެވެ.