ނައިބު ރައީސް ހުސައިން މުހައްމަދު ލަތީފް އިނގިރޭސިވިލާތުގެ ރަސްގެފާނު ޗާލްސް (ތިނެއް)އާ ބައްދަލުކުރައްވާ ރާއްޖެ ވަޑައިގަތުމަށް ދައުވަތު އަރުވައިފި އެވެ.

ނައިބު ރައީސް ރަސްގެފާނު ޗާލްސްއާ ބައްދަލުކުރެއްވީ ކޮމަންވެލްތު ގައުމުތަކުގެ އިސްވެރިންގެ 27 ވަނަ ބައްދަލުވުމުގެ ހަވާސާގެ ތެރެއިން ރަސްގެފާނު ދެއްވެވި ރޭގަނޑުގެ ފަރިއްކޮޅެއްގެ ތެރެއިންނެވެ.

ނައިބު ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ރަސްގެފާނާ ބައްދަލުވުމަކީ ލިބުނު ޝަރަފެއްކަމަށެވެ.

ރަސްގެފާނާ ބައްދަލުވެ، ރައީސް މުހައްމަދު މުއިއްޒުގެ ފަރާތްޕުޅުން، ރާއްޖެއަށް ވަޑައިގަތުމަށް ރަސްގެފާނަށް ދައުވަތު އަރުވައިފައިވާކަމަށް ވިދާޅުވި އެވެ.

ރައީސް މުއިއްޒު ވެސް ވަނީ މިދިޔަ ޑިސެމްބަރު މަހު ދުބާއީގައި ބޭއްވި ކޮޕް-28 ގެ ހަވާސާގައި ރަސްގެފާނު ޗާލްސްއާ ބައްދަލު ކުރައްވާފަ އެވެ. އެ ބައްދަލުކުރެއްވުމުގައި ދެބޭފުޅުން ވަނީ ރާއްޖެ އާއި އިނގިރޭސިވިލާތާ ދެމެދުގައިވާ ޒަމާންވީ ގުޅުމުގެ މައްޗަށް އަލިއަޅުއްވާލައްވައި، މި ގުޅުން އިތުރަށް ބަދަހިކުރެއްވުމާ ގުޅޭ ގޮތުން ވާހަކަ ދައްކަވައިފަ އެވެ.

އިނގިރޭސިވިލާތުގެ ރަސްކަންކުރެއްވި ބޭފުޅަކު މިހާތަނަށް ރާއްޖެ ވަޑައިގެންފައިވަނީ 1972 ވަނަ އަހަރު، އޭރު ރަސްކަން ކުރެއްވި ޗާލްސްގެ މަންމާފުޅު ރާނީ އެލިޒަބަތު ދެއެކެވެ.

ކޮންމެ ދެ އަހަރުން އެއްއަހަރު ބާއްވާ ކޮމަންވެލްތު ގައުމުތަކުގެ އިސްވެރިންގެ މިފަހަރުގެ ބައްދަލުވުމަށް ނައިބު ރައީސާއެކު ސަމޯއާއަށް މަތީ ފަންތީގެ ވަފުދެއް ވަޑައިގެންފައިވެ އެވެ.