ކުޑަ އިންޓްރެސްޓް ރޭޓެއްގައި ބޯހިޔާވަހިކަމަށް ދޫކުރާ ލޯނު ސްކީމުގެ ދަށުން ލޯނަށް އެދުމުގެ ފުރުސަތު އަންނަ މަހުގެ ފުރަތަމަ ހަފުތާގައި ހުޅުވާލާން ނިންމައިފި އެވެ.

"ހިޔާވެހި ފައިނޭންސިން ސްކީމް" ފެށުމަށް ކުރާ މަސައްކަތުގެ ތެރެއިން ފައިނޭންސިން ޕާޓްނަރެއްގެ ގޮތުގައި ގައުމީ ބޭންކް، ބީއެމްއެލްއާ އެކު، ހައުސިން މިނިސްޓްރީން މިއަދު ވަނީ އެމްއޯޔޫއެއްގައި ވެސް ސޮއިކޮށްފަ އެވެ.

މިއަދު ބޭއްވި ރަސްމިއްޔާތެއްގައި ހައުސިން މިނިސްޓްރީގެ ފަރާތުން އެ އެމްއޯޔޫގައި ސޮއިކުރެއްވީ މިނިސްޓަރު ޑރ. އަލީ ހައިދަރު އަހުމަދެވެ. އަދި ބީއެމްއެލްގެ ފަރާތުން ސޮއިކުރެއްވީ ބޭންކުގެ ސީއީއޯ މުހައްމަދު ޝަރީފެވެ.

މިފަދަ ޕާޓްނާޝިޕް އެއްބަސްވުމުގައި މީގެކުރިން ހައުސިން މިނިސްޓްރީން ވަނީ އިސްލާމިކް ބޭންކާއި އެޗްޑީއެފްސީގެ އާއެކު ވެސް ސޮއިކޮށްފަ އެވެ.

އެ ލޯނު ދޭން ހަމަޖެހިފައި ވަނީ ފަސް ޕެސެންޓުގެ އިންޓްރެސްޓް ރޭޓުގަ އެވެ. ލޯނު އަނބުރާ ދެއްކުމަށް 25 އަހަރު ލިބޭނެ އެވެ.

ލޯނު ދޫކުރާނީ އަލަށް ގެއެއް އިމާރާތްކުރާ މީހުންނަށެވެ. އެކަމަކު ގެއެއް އިމާރާތްކުރަން ފަށައި ނުނިމި ހުރި ނަމަ، އެ މަސައްކަތް ނިންމަން ވެސް ލޯނު ދޫކުރެ އެވެ.

ހައުސިން މިނިސްޓްރީން ބުނީ ބީއެމްއެލްއާއެކު މިއަދު ސޮއިކުރި އެމްއޯޔޫގެ ދަށުން އަންނަ މަހު އެ ލޯނަށް އެދުމުގެ ފުރުސަތު ހުޅުވާލުމަށް ތައްޔާރުވަމުން އަންނަ ކަމަށެވެ.