ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް މިހާރު އެ މަގާމުގައި ހުންނެވި އަސްމާ ޝަފީއުގެ ނަމާ އެކު އިތުރު ނަމެއް މަޖިލީހަށް ފޮނުވައިފި އެވެ.

މިވަގުތު އެ މަގާމުގައި ހުންނެވި ހއ. އިހަވަންދޫ، ވައިޖެހޭގެ، އަސްމާ ޝަފީއުގެ މަގާމުގެ ދައުރު ހަމަވާނީ މިމަހުގެ 31 ވަނަ ދުވަހުގެ ނިޔަލަށެވެ.

ޓެކްސް ނެގުމާ ބެހޭ އިދާރީ ގާނޫނުގައިވާ ގޮތުން މީރާ ހިންގާ ޑިރެކްޓަރުންގެ ބޯޑުގައި ހިމެނޭނީ ޓެކްސް ކޮމިޝަނަރާއި ޑެޕިއުޓީ ޓެކްސް ކޮމިޝަނަރު ހިމެނޭހެން ހަތް މެންބަރުންނެވެ. ކޮންމެ މެންބަރެއްގެ ވެސް ދައުރަކީ ފަސް އަހަރުގެ މުއްދަތެކެވެ.

ޑެޕިއުޓީ ޓެކްސް ކޮމިޝަނަރުގެ މަގާމަށް ރައީސް މުހައްމަދު މުއިއްޒު ފޮނުއްވާފައިވާ ދެ ނަމަކީ އެ މަގާމަށް ކުރިމަތިލުމަށް ހުޅުވާލުމުން ހުށަހެޅި ފަރާތްތަކުގެ ތެރެއިން ޝަރުތު ހަމަވާ ފަރާތްތަކެވެ. އޭގެ ތެރެއިން ރައީސް އިސްކަން ދެއްވި ތަރުތީބަކީ ފާތިމަތު އަމީޒާ، ކޯޒީ ރައުންޑް/ގދ. ގައްދޫ، އަދި އަސްމާ އެވެ.

މީރާގެ ކޮމިޝަނާ ޖެނެރަލް އޮފް ޓެކްސޭޝަންގެ މަގާމުގައި މިހާރު ހުންނެވީ ކުރިން ޑެޕިއުޓީ ކޮމިޝަނާ ޖެނަރަލްގެ މަގާމުގައި ފުރުއްވި ހަސަން ޒަރީރު އެވެ. އޭނާ މީރާގެ ކޮމިޝަނަރު ކަމަށް އައްޔަންކުރެއްވީ މިދިޔަ މަހުގެ 23 ވަނަ ދުވަހު އެވެ.