ދިވެހި ލެންގުއެޖް، ކަލްޗަ އެންޑް ހެރިޓޭޖް (ގައުމިއްޔަތު) މިނިސްޓްރީގެ ސިޔާސީ މުވައްޒަފުންގެ ތެރެއިން ޕީއެންސީގެ މެންބަޝިޕް ފޯމް ހަވާލުނުކުރާ މުވައްޒަފުން ފޯމް ހަވާލުކުރުމަށް ކުޑަ މުހުލަތެއް ދީފި އެވެ.

ގައުމިއްޔަތު މިނިސްޓްރީގެ "ސިޔާސީންނަށް ދަންނަވާ" ވަޓްސް އެޕް ގްރޫޕްގައި މިނިސްޓަރުގެ ފަރާތުން ފޮނުވާފައިވާ މެސެޖެއްގައި ބުނެފައިވަނީ ޕީއެންސީއަށް މެންބަރުން ހަމަކުރުމަށް ކުރިއަށް ގެންދާ ހަރަކާތުގެ ތެރެއިން އެ ވުޒާރާއަށް އައްޔަންކުރައްވާފައިވާ ސިޔާސީ މުވައްޒަފުން ފުރުއްވަމުން ގެންދަވާ ފޯމުތައް ހަވާލުނުރައްވާ ބޭފުޅުން މިއަދުގެ 15:00 ގެ ނިޔަލަށް މިނިސްޓަރުގެ ބިއުރޯއާ ފޯމް ހަވާލުކުރެއްވުމަށް ވަޒީރު ވިދާޅުވި ކަމަށެވެ.

ގައުމިއްޔަތު މިނިސްޓްރީގެ ވަޓްސް އެޕް ގްރޫޕްގައި ހިއްސާކޮށްފައިވާ މެސެޖް

ބެލެވޭ ގޮތުގައި ސަރުކާރުގެ އެހެން އިދާރާތަކާއި އެއްގޮތަށް، ގައުމިއްޔަތު މިނިސްޓްރީން ވެސް މަސައްކަތް ކުރަމުންދަނީ ވީ އެންމެ އަވަހަކަށް ޕާޓީއަށް ފޯމް ހަމަކުރުމަށެވެ. ޕީއެންސީން ވަނީ ހުރިހާ މިނިސްޓަރުންނާއި ސިޔާސީ މުވައްޒަފުން ވަކި އަދަދަކަށް ޕާޓީއަށް ފޯމް ގެނައުމަށް އަންގައިފަ އެވެ.

ނަމަވެސް މިހާތަނަށް ފޯމު ހަވާލުކުރެވުނީ ޖެންޑާ މިނިސްޓްރީ އަށާއި ފިޝަރީޒް މިނިސްޓްރީގެ "ޓީމް ފިޝް" އަށެވެ.