އިންޑިއާގެ ވަރުގަދަ ވިޔަފާރިވެރިޔާ އަދި ޓާޓާ ސަންސް (ޓާޓާ ގްރޫޕް) ގެ ކުރީގެ ޗެއާމަން ރަޓަން ޓާޓާ އަވަހާރަވެއްޖެ އެވެ.

ރަޓަން ޓާޓާ އަވަހާރަވީ މުމްބާއީގެ ހޮސްޕިޓަލެއްގައި ފަރުވާދެމުންދަނިކޮށް ރޭގެ ވަގުތެއްގަ އެވެ. އަވަހާރަވިއިރު އުމުރުފުޅަކީ 86 އަހަރެވެ.

ރަޓަން ޓާޓާ މުމްބާއީގެ ކޭންޑީ ހޮސްޕިޓަލުގައި އެޑްމިޓްކުރީ މި މަހުގެ 7 ވަނަ ދުވަހު އެވެ. އެޑްމިޓްކުރީ ދޮށީ އުމުރުފުޅުގެ އާލާސްކަންފުޅާއި ލޭ މައްޗަށް ދިއުން ކޮންޓްރޯލް ނުވެގެންކަމަށް ރިޕޯޓްތައް ބުނެ އެވެ.

ރަޓަން ޓާޓާ އަވަހާރަވިކަން ޓާޓާ ސަންސްގެ މިހާރުގެ ޗެއާމަން އެން ޗަންދްރަސޭކަރަން ވަނީ އިއުލާނުކުރައްވާފަ އެވެ.

ރަޓަން އަވަހާރަވުމާއެކު އިންޑިއާގެ އިސްވެރިންނާއި ވިޔަފާރިވެރިން ހިމެނޭހެން އެކި ބޭފުޅުންގެ ތައުޒިޔާގެ އެކި މެސެޖުތައް ސޯޝަކް މީޑިއާގައި އަންނަނީ ހިއްސާކުރައްވަމުންނެވެ.

ރަޓަން ޓާޓާ، ޓާޓާ ސަންސްގެ ހިންގުމާއި ހަވާލުވެވަޑައިގެންނެވީ 1991 އަހަރު އެވެ. ރަތަން ޓާޓާއަކީ 1996 ވަނަ އަހަރު އުފެއްދި ޓެލެކޮމިއުނިކޭޝަން ކުންފުނި، ޓާޓާ ޓެލެސާވިސަސްގެ ވެސް ފައުންޑަރެވެ. އޭގެފަހުން އައިޓީ ކުންފުންޏެއްކަމަށްވާ، ޓާޓާ ކޮންސަލްޓެންސީ ސާވިސަސްގެ ހިންގުމާ 2004 ވަނަ އަހަރު ހަވާލުވެވަޑައިގެންނެވި އެވެ. އޭނާ ރިޓަޔާ ކުރެއްވީ 2012 އަހަރު އެވެ.

ޓާޓާ ސަންސް ގްރޫޕަކީ ޓާޓާ އާއިލާއަށް ނިސްބަތްވާ އާއިލީ ވިޔަފާރިއެކެވެ. އެއީ އިންޑިއާގެ ގުޖުރާތައް ނިސްބަތްވާ ޖަމްޝޭދްޖީ ޓާޓާ ނަމަކަށްކިޔާ ވިޔަފާރިވެރިއަކު 1868ގައި ފެށި ވިޔަފާރިއެކެވެ. ޖަމްޝޭދްޖީ ޓާޓާ އަށް ތިން ދަރިން ލިބިލެއްވިއިރު ރަޓަން ޓާޓާ އަކީ ޖަމްޝޭދްޖީ ޓާޓާގެ ދެވަނަ ފިރިހެން ދަރިކަލުން ރަތަންޖީ ޓާޓާގެ ކާފަ ދަރިކަލެކެވެ.