ކުރީގެ ރިއަލިޓީ ޓީވީ ތަރި ޕެރިސް ހިލްޓަން އޭނާގެ އޭޑީހެޗްޑީ ހުންނަކަން ހާމަކޮށްފި އެވެ. އޭނާ މިކަން ހާމަކޮށްފައިވަނީ ޓީން ވޯގްއަށް އޭނާ ދިން އަމިއްލަ އިންޓަވިއުއެއްގަ އެވެ.

އޭނާ ބުނި ގޮތުގައި އޭނާގެ އޭޑީއެޗްޑީ ގެ ސިފަތައް ވަރަށް ކުޑައިރު ފެންނަން ފެށިކަމަށެވެ. " އަބަދުވެސް މީހުން ބުނާނެ އަހަރެން މާ އެނާޖީ ހުރޭ، ވަރަށް ފަސޭހައިން ޑިސްޓްރެކްޓްވޭ، މާ ވާހަކަ ގިނައޭ، އެންމެނަށްވެސް އަހަރެންގެ ކަންތައް މާ ބޮޑުވެފަ އޭރު ހުންނަނީ" އޭނާ އިންޓަވިއުގައި ބުންޏެވެ.

ކުޑައިރު އެއްވެސް މީހަކަށް އޭނާގެ އޭޑީއެޗްޑީ ހުންނަކަން ފާހަގައެއްނުވެ އެވެ. އަދި ޓެސްޓެއްވެސް ނުކުރެ އެވެ. "ވަރަށް ގިނަ ދުވަސްވަންދެން އެކަކަށްވެސް ނޭނގޭ އަހަރެންގެ ސިކުނޑި މަސައްކަތް ކުރާ ގޮތެއް. ސްކޫލްގައި ޖެހޭ އެކި އެކި މައްސަލަތަކާ ހެދި ދެން ފޮނުވާލީ ޕްރައިވެޓް ސްކޫލަށް. އެއީ ހައްލަކަށް ނުވި." ޕެރިސް ބުންޏެވެ.

"އަހަރެންގެ އޭޑީއެޗްޑީ ހުންނަކަން އިނގުނީ މާ ފަހުން. ޑައިގްނޯސްވީމަ ފުރަތަމަ އިހްސާސްވީ އެވެސް ލޭބަލް އެކޭ. މީހުން ދެކޭނީ އަހަރެން މީ މާ ތަފާތު މީހެކޭ. އެކަމަކު އޭޑީއެޗްޑީގެ އެ ބަޔަކީ އޭގެ އެއް ފަރާތް. އަނެއް ފަރާތަކީ އޭގެން އަންނަ ކްރިއޭޓިވިޓީ، ޕެޝަން އަދި ހިތްވަރު. ތަފާތުކޮށް ވިސްނާ ސިކުނޑި. އަހަރެން ދެކެނީ އެއީ އަހަރެންގެ ސުޕަޕަވާގެ ގޮތުގައި" ޕެރިސް ބުންޏެވެ.

ޕެެރިސް ބުނި ގޮތުގައި އޭޑީއެޗްޑީ ހުުރުމުގެ ސަބަބުން އޭނާއަށް ފައިދާވާކަމަށެވެ. އާ ޕްރޮޖެކްޓަކުގައި ހައިޕާ ފޯކަސް ކުރެވި ބުރަކޮށް މަސައްކަތްކޮށް އަދި އިތުރު އެހެން ޕްރޮޖެކްޓްތައް ފެއްޓުމަށް ހިތްވަރު ލިބޭ ކަމަށެވެ. ނަމަވެސް އޭގެ ބައެއް އުނދަގޫ ކަންކަންވެސް ހުންނަ ކަމަށް އޭނާ ވަނީ އެއްބަސްވެފަ އެވެ.